781/2024-2025

Champhai, the 12th June, 2024: Adviser to Chief Minister (Technical) Er. H. Ginzalala, Champhai North bialtu MLA chuan vawiin chawhma dar 11:00 khan a bial chhung Champhai District Ngur khuaa Loneitute kawmin an khaw tana eizawnna ngelnghet siam kawnga hmalakna tur tha ni a an hriatte a sawipui.

Adviser to Chief Minister (Technical) Er. H. Ginzalala chuan Champhai North bial chhung khaw hrang hrangah a khaw mil ang zelin eizawnna ngelnghet zawk siam tura ngaihtuahna sen a nih thu sawiin, hemi atan hian hmalakna tur ngaihpawimawh bik thlan chhuah a nih thu leh ruahmanna tinzawna hmalak chhoh mek zel a nih thu a sawi a. Ngur khaw tan pawh hetiang lam hawi hmalakna tur thlan chhuah tum a nih thu leh phur taka tawiawm turin a sawm a. A bial chhung khaw hrang hranga eizawnna ngelnghet din tura hmalakna tur hrang hrangte tarlangin, thei leh thlai thar chhuahte chu a sawngbawlna tur mai bakah zawrh chhuah tlak ni tura tanlak tum a nih thu a a sawi a. A hralhna tur chungchangah mimal sumdawng entrepreneur-te pawhluh leh thawhdunpui thiam a tul thu sawiin, Agriculture leh Horticulture kaihhnawih Loneitu kalkhawmte chu an khaw tana tha tur ber ngaihtuaha theihtawp chhuah turin a chah a; an duhthlante theihtawp chhuaha hmalakpui a inhuam thu a sawi bawk.

He hunah hian Ngur khaw tana thlai chin tur chungchangah inrawnkhawmna zau taka neih niin, Nihawichi, Dawnfawh, Sapthei leh thlai dang ching tura tul leh pawimawhte sawiho a ni a. Heng bakah hian Kel vulh chungchang pawh tarlan niin, zirchianna zau zawk neia inrawnkhawmna pawh a tul ang zela neih leh nise tih a ni.

He hun Ngur Community Hall-a hman hi District Bawrhsap Pu James Lalrinchhana chuan kaihruaiin kalkhawmte lawmna thu a sawi a. Bialtu MLA in a bial chhung tihhmasawnna turin project design 26 lai a ruahman thu sawiin, thahnemngai takin MLA hmalakna leh ruahmannate thlawpa a tihlawhtlingtu nih tum turin kalkhawmte a fuih bawk.

Vawiin inrawnkhawmna hunah hian DAO Champhai Pi R. Lalramhluni leh DHO Champhai Pu K. Zonunsanga te'n Agriculture leh Horticulture Department kaltlanga hmalakna leh loneitute tana scheme pawimawhte an sawifiah a. Loneitu kalkhawmte chu tunlai thiamna leh khawl hmanga hlawk zawka hnathawh pawimawhnate, tangkai zawka leilet hman dante, leichi hman dan dik leh hlawk zawka buh leh thlai thar chhuak tura hriattur pawimawhte an zirtir a. Ngur VCP Pu Ricky Lalthansanga'n lawmthu sawiin hun hman a khar a ni.