782/2024-2025

Dated Aizawl, the 12th June, 2024: Vawiin khan Chief Minister chuan a office-ah Hlimen leh Melthum leimin tuar leh hmun him lova awm insawnchhuah lailawk ngai te aiawh hruaitute a kawm a. Pi Baryl Vanneihsangi Tlau, bialtu MLA chuan a tawiawm.

Heng hmun him lova cheng, insawn lailawk ngaite hi School building leh hmun remchangah an invawm lut hlawm a. Zirna hi a pangaia a kal chhoh leh tawh dawn avang te, AMC Bye Election neih huna Polling Station a hman tur te a ni hlawm a. Chuvang chuan Relief Camp ngaihtuah ran tul an tih thu Chief Minister hnenah hian an thlen a ni.

Chief Minister hian Transport Department rama Temporary Relief Camp a rang lama sak a nih tur thu leh chu hmunah chuan nakkum January thla thlenga an chen lailawk theih tur thu a lo hrilh a. DM & R lamin Camp sakna tur sum pawh an kawl reng tawh tih sawiin, hna an tan nghal mai tur thu a lo hrilh. Chhungkaw insawn ngai zawng zawng te chu buhfai bag khat theuh a pek ve tur thu pawh a lo hrilh a ni.

Leimin tuartute sawi danin chenna in 46 a khawsa chhungkaw 69 vel te hmun him lam panin an inthiar chhuak a ni.