104/2025-2026

Aizawl, the 9th April 2025: Vawiin khan Aizawl West I bialtu MLA Pu TBC Lalvenchhunga, Adviser to CM chuan a bial chhung Chawlhhmunah Mizoram Cooperative Apex Bank Branch thar leh ATM booth a hawng.

Pu TBC Lalvenchhunga chuan, a bial chhungah Apex Bank lamin Branch pahnih tunhnaia an hawng thar chu lawmawm a tih thu a sawi a. Apex Bank hian Mizote hna a pek mai bakah mi tam tak te hnenah eizawnna bultanna leh hmalakna nei tawhte hmasawn zelna loan a pe chhuak tha a. Credit Deposit Ratio nei tha ber zinga mi a ni reng bawk. Chuvang chuan Mizoram Cooperative Apex Bank hi a tangkai em em a ni. Ramin hma a sawn zelna kawngah bank te an pawimawh avangin Mizorama bank awm te hnathawh dan hi kan chik hle a, SLBC meeting-ah kan infuih nasa thin hle. Apex Bank pawh hi inzar zau zel thei ula kan duh a, Financial Services chi hrang hrang mobile banking, insurance, investment leh a kaihhnawih lamah pawh hma in sawn ve zel a tul hle, tiin an kal zelna turah duhsakna a hlan.

Apex Bank Chairman Pu Lalnunsanga pawhin thu sawiin, an bank chu bank dang ang ni lo va, Agriculture sector leh kuthnathawktute tana din an nih thu a sawi a. Mizoram sawrkar pawh shareholder lian tak niin, Mizo te bank ti a sawi theih kan ni, a ti. Mizorama co-operative movement hmasawnna hnar kaitu ber an nih thu te, loan pe tha ber pawl an nih thute a sawi bawk.

Apex Bank Chairman leh hotu dang te, Cooperation Department officials te leh khawtlang hruaitute an tel a, mipuite pan theih turin an inhawng nghal a ni.