103/2025-2026

Siaha the 9th April 2025: Union Minister of State for Home Affairs, Pu Nityanand Rai chuan tukin zing dar 8:30 khan Siaha Helipad-ah lo tumin sawrkar official ten an lo hmuak.

Union Minister Pu Nityanand Rai hmuahna hun hi CEM Bungalow ah hman a ni a, felicitation hun hman a nih hma hian Siaha District MLA te, MADC hotute, Mizoram sawrkar official-te bakah NGO hrang hrang hruaitute nen inkawmna hun tawi an nei hmasa a, hemi zawh hian felicitation hun hman chhunzawm nghal a ni.

CEM Bungalow tual zawla Minister hmuahna hun hi Pu M Laikaw, Chief Executive Member (CEM), MADC chuan a kaihruai, Minister leh amah lo tawiawmtute chu District mipui aiawha lo lawmin Sawrkar Laipui Minister in Siaha a tlawh thei chu thil ropui tak a ni, a ti. MADC in rei tak a lo buaipui tawh, District Council in thuneihna sang zawk an neih theih nana 6th Schedule of the Indian Constitution Amendment chungchang sawiin tih hlawhtlin pui ngei turin a ngen a, Minister leh amah rawn tawiawmtute chu hun hlimawm tak hmang turin leh an hma lam hun zel atan duhsakna a hlan nghal a ni.

Union Minister of State Pu Nityanand Rai chuan nimin lama rawn kal tum an ni nain khua in a zir loh avangin vawinah an rawn kal ta zawk chu mipui hriatthiamna a ngen a, mipui aiawha a kawm tak ten harsatna hrang hrang a hnena an thlente chu sutkian a nih theih nan theihtawp chhuahpui a tum tih a tarlang. Minister chuan Prime Minister Pu Narendra Modi chuan Hmarchhak State te a ngaipawimawh em em a, India Ram hmasawnna atana pawimawh tak chu Hmarchhak State ten hma an sawn phawt chu a ni tiin sawrkarna fawng an vawn tirh atangin hmasawnna tam tak hmuh tur a awm tawh a ni, a ti. Pu Nityananad Rai chuan Siaha District chu Ram dang nena boundary nei a nih avangin a venhim kawngah mipui tawiawmna a pawimawh hle a ti bawk.

National Education Policy 2020 chungchang sawiin pianpui tawng (mother tongue) a zirlaiten an zir theih chu NEP 2020 thil tum pawimawh tak pakhat a ni a, Hindi tawng chawisan tumna nilovin Ram chhunga tawng chi hrang hrang awm te chawisan nana duan a ni, a ti. Citizenship Amendment chungchang pawh sawiin ram chhunga Sakhaw dang vuantute nekchepna a ni lo a, Ram thenawm leh ram danga Sakhuana avanga tihduhdah tuarte tan zalen taka an chen theih nan leh India ram chu Sakhaw hrang hrang vuantuten zalen taka an awm theih nana duan a ni a tibawk a ni. Pu Nityanand Rai, MoS for Home Affairs chuan kalkhawmte chu eng mi pawh nise, Prime Minister Pu Narendra Modi an India ram tana a hna thawhte hriatsak a, midang hrilhchhawngtu nih tum theuh tura chahin a ngen hlawm bawk a ni.

Union Minister Pu Nityanand Rai hi Pu Devesh Kumar, Bihar MLC & Mizoram State Prabhari, Pu Vanlalhmuaka, State President, Mizoram Pradesh bakah Pu Arjun Singh, Inspector (PA) CRPF ten an lo tawiawm a. Vawiin vek khan Lawngtlai lam panin an chhuak leh nghal a ni.