1539/2026-2027

Aizawl, ni 28 July, 2026: Vawiin khan Pu TBC Lalvenchhunga, MLA, Adviser to Chief Minister (Finance & Planning) chuan Govt. Aizawl West College (GAWC) Freshers' Social 2026 Vanapa Hall-a buatsaih chu Chief Guest niin a hmanpui.

Thu sawiin khuallian chuan, zirna ṭha chu "All-round development" a ni a, ṭhangtharte hi kawng tin renga hmasawn ngai tak dinhmunah kan ding tawh a ni. A chhan chu sorkar hna hian min daih seng lo va, entrepreneurship lama kan kal nasat a ṭul a, inelna a sang tawh em em a. Sumdawnna emaw thilsiamna emaw din thei, mahni kea ding thei ni tura kan inbuatsaih uar zel a ngai. Artificial Intelligence lamah  khawvel a ṭhang chak hle a, AI hi hman thiam a pawimawh rualin, keimahni theihna tihpun tum lo va, AI rinchhan ringawta thil kan zir a hlauhawm thung a, keimahnia awm kan theihnate tichak tura lehkha kan zir a ṭul a ni, a ti. 

Pu TBC Lalvenchhunga hian, Aizawl West College campus thar sakna tur Rs. 30.40 crores SASCI aṭangin an dah thu leh, hna hi kalpui mek a nih thu a sawi a. Mizoram sorkarin zirna tihhmasawnna kawngah hma a laknate a tarlang bawk a ni. 

Khuallian hian H. Vanlalkeuva Award leh Best Library User Award 2025-26 chu a dawngtute hnenah a hlan a, College Annual Magazine 33-na a tlangzarh nghal bawk a ni. 

Aizawl West College Principal Dr. PL Ramliana chuan kalkhawmte lawmna thu a sawi a, Students' Union General Secretary Sophia Sumsiansiam Guite chuan report a pe a. Robert Laltlansanga, Asst. General Secretary, GAWC Students' Union chuan lawmthu sawiin hun a khar a ni.