833/2024-2025

Champhai, the 15th June, 2024: Adviser to Chief Minister (Finance & Planning) Pu TBC Lalvenchhunga, MLA hovin vawiin khan YMA Day vawi 89-na chu Kelkang Community Hall-ah ropui taka lawm a ni.

Khuallian Pu TBC Lalvenchhunga, Adviser to CM (Finance & Planning) chuan kalkhawmte YMA Day chibai bukin, ngaihhlut tur dik tak ngaihhlut leh ngaihsan tur dik tak ngaihsan nachang kan hriat deuh deuh a pawimawh thu a sawi a. Kut tling lova sum la leh hlepru thinte dinhmun thaa dah an ni leh ngaihsan an hlawh thin chu sim a tul thu sawiin, YMA member leh zoram mipuite chu hlemhletna leh ruihhlo do kawnga tan la theuh tura a chah bakah nuam tih zawngte pela pen chhuak ngam turin a fuih bawk a. Ruihhloin thalaite a ei chhiatzia leh tanlak a ngaihzia tarlangin, zoram mipuite chu theihtawp chhuaha ruihhlo do chhunzawm zel tur leh sawrkar hmalaknate tha taka thlawp tlat turtein a sawm nghal bawk. 

Kelkang khuaa YMA Day lawmna hun hi Pu H. Vanlalrimawia, President, Kelkang Branch YMA chuan kaihruaiin Pu Rosangzuala, Secretary-in inlawmna thu a sawi a. Kumpuan thupui ‘Ram leh hnam humhalh’ tih chu Pu T. Lalhipliana'n a sawifiah a. YMA thuthlung sawiho niin, hlado chhama intihsiak a ni a. He hunah hian Kelkang khawtlang chuan an khawchhuak Pu TBC Lalvenchhunga chawimawina hun an hmang bawk. 

Hun hman zawh hian Adviser to CM (Finance & Planning) chuan Kelkang NGO hruaitute leh VC te kawmin hun a hmanpui a. Chawhnu lamah intihsiakna hrang hrang buatsaih chhunzawm niin, hlim takin YMA Day pual ruai kilho a ni. 

YMA Day 2024 pual hian Kelkang Branch YMA chuan programme hrang hrang a siam a. Nizan atangin intihsiakna chi hrang hrang 21 lai mai hmanga inel a ni a, zanin hian intihsiakna neih chhunzawm leh tur niin, result puan leh YMA Day kharna inkhawm neih a ni ang.