832-2024-2025

Aizawl, the 15th June 2024 : Agriculture Minister Pu PC Vanlalruata, Tuikum bialtu MLA ni bawk chuan vawiin khan Joint YMA Chhingchhip in YMA Day vawi 89-na,  lawmna Chhingchhip Community Hall a an buatsaih chu khuallian niin a hmanpui a. CYMA CEC Pu Lalrammuana pawhin he hun hi khualzahawm niin a hmanpui a ni.

Agriculture Minister Pu PC Vanlalruata chuan YMA member kalkhawmte chu YMA Day chibai bukin hlim leh lawm takin hun hmang turin a duhsakna a hlan a. YMA thil tum thenkhatte sawi zauin hun awl hman that hi tunlai thalai ten kan zir thar a ngai a, mobile kan hman nasat hian kan nunah nghawng thui tak a nei thei a, mimal nun leh khawtlang nun thlengah harsatna a thlen thei a, chuvangin mitin a hman dan hi kan enfaih a tul hle, a ti. Kristian nun dan tha ngaihsan leh chu chu a taka nunpui chu YMA thil tum zinga ami anih thusawiin hei engtik lai pawhin ngaihpawimawh turin kalkhawmte a chah a ni.

Tunlai ah thalai te zinga aia upate zahna a tlachham emaw tia sawi thin chu a vei thusawiin hei hi kan hnam rohlu a ni a, kan inzirtir zel leh kan chawmnung zel a tul hle a ni, a ti. YMA member te chu ruihlo taka fihlim tura chahin ruihlo in min tibuai zel chuan kan chhungkua leh khawtlang nun bakah kan ram in a tuar zel dawn a, chuvangin thangtharte chu hetiang lamah in fihlim a tul a, ti lo Turin in intiam a tul hle a ni, a ti. Thalai, a bik takin mipa boral an tam chu a veiawm leh a ngaihtuahawm  thu sawiin hei kawng hrang hrang kan in enlet a pawimawh a, kan vei tlan a tul a ni, a ti.

Minister hian YMA Day lawm nan Joint YMA hruaitute chu Silpauline bundle khat a hlan bakah hun hmangtu YMA Chhang Branch pathum te chu cheng 1000 theuh a hlan a ni.

YMA Day lawmna hi Pu C. Lalchhuanmawia, Treasurer, Joint YMA in a kaihruai a,  programme ah hian hnam lam leh lemchan entir niin  khawtlang hruaitute bakah mi hlun hrang hrang atangin thusawite ngaihthlak a ni. Joint YMA Chhingchhip hnuaia Branch 3 an awm a, member mi 2444 an awm mek a ni.

Mizorama tlawmngai pawl lian ber leh huapzau ber  - YMA hi June ni 15, 1935 khan Young Lushai Association hming pu in Zosap missonary te leh khatih laia Mizo lehkhathiam hmasa leh mi challang tak tak tena an din a ni a. Kum 1947 ah a hming hi YLA atangin Young Mizo Association tia thlak a ni. 

Tunah hian CYMA hnuaia Branch 821 a awm a, heng zinga Branch 54 te chu Mizoram pawn Branch din te niin Aizawl khawpui chhungah pawh Branch 109 lai an awm bawk. Member mi 4,90,601 an awm mek a, chung zinga mi 2,03,743 te chu hmeichhia an ni.

Kum 1986 leh 1993 ah te khan ram ngaw humhalh kawngah hmalakna tha a neih leh a thawhhlawk avangin India ram pum huapa Environment Award hlun tak Indira Gandhi Pariyavaran Puraskar hi YMA in alo dawng tawh a. Ruihlo dona kawngah thawh that avangin NGO bika hmalatu tha ber chawimawina  National Award for Outstanding Service in the field of Prevention of Alcoholism and Substance (Drug) Abuse chu kum 2013 a khatih laia President of India Shri Pranab Mukherjee atangin YMA in dawng bawk a ni.