831/2024-2025

Khawzawl, 15th June 2024: Deputy Govt Chief Whip, Tuichang bialtu MLA ni bawk Pu W. Chhuanawma chuan vawiin khan Khawzawl Kawnzar Branch YMA Golden Jubilee lawmna chu khuallian niin a hman pui.

Khawzawl Kawnzar YMA Hall-a Golden Jubilee lawmna inkhawm neihah Pu W. Chhuanawma chuan Khawzawl Kawnzar Branch YMA ten Golden Jubilee hmanpuia, khuallian ni tura an sawm chu a lawm thu a sawi a. He huna kalkhawm thalaite chu hmasawn a pawimawh zia hre thar tura a duh thu sawiin, tui tling reng, luangchhuak lo chu a tenawm thuai thin ang bawkin nihna ngaia mi a awm reng chu thil tha lo tak a ni, a ti.

Tuichang bialtu MLA hian hmasawn tur chuan hun awl hman that leh hman dik a ngai a ni, a ti a. Mitinin hun thuhmun darkar 24 theuh an nei a, chu hun hmang thiam te chuan malsawmna an dawng mai thin a ni, a ti. Thil theih leh theih loh danglamna chu mihringte tumruhnaah a awm tih sawiin Pu W. Chhuanawma chuan tumruhna leh thawhrimna chu hlawhtlinna bul pawimawh tak pahnih a ni, a ti a. Hlawhtling tur chuan hloh huama chet (risk) lak tul thu pawh sawiin, hlawhtling tur chuan hlawhchham ngam hmasak a ngai, a ti. Pu W. Chhuanawma chuan hmasawn tur chuan tunlai khawvel danglam ang zela inher danglam leh insiam rem ngam a tul a ni a ti a,khawvel hmasawnna in a ken tel social media te hi hman thiam chuan thil tangkai tak, hmasawnna kawnga min pui thei tur a ni a ti a,chutih rualin a hmang thiam lo tan erawh chuan harsatna leh manganna thlentu mai a ni thung a ni, a ti.

Jubilee Lawmna programme hi Pu Vanlalvenhima, Chairman, Jubilee Organising Committee chuan a kaihruai a. Pu B Lalchhanchhuaha ,Secretary, Org. Committee in Report pein,Pu B Lalchhuanthanga, Br Executive Member leh Pu Zothansiama Colney, Treasurer Kawnzar VC in thu an sawi bawkah,YMA hruaitu hluite chawimawina hun hman a ni a. Zai leh hnam lam hmuhnawm leh ngaihnawm tak tak enho niin, zaithiam sawm bik ten hun an hmang bawk a ni. Kawnzar YMA te hian vawiin tlai lamah Golden Jubillee lawmna ruai an theh dawn bakah zanin vek hian Jubillee Concert neiin zaithiam hrang hrang ten hun an hmang bawk dawn a ni.