830/2024-2025

Aizawl, the 15th June 2024:  Vawiin Chawhma khan Hmunpui Community Hall-ah YMA Day 89-na pual program Hmunpui YMA in a buatsaih chu Khuallian niin a hmanpui.

Home Minister Pu K.Sapdanga chuan YMA Day pualin Zoram dung leh vanga YMA member te duhsakna chibai a buk hmasa a. Sawrkar anga tih remchang lo Raltlan lo buaipui leh chhawmdawl chungchangah te, chhiatrupna  a lo thlen changa kawng tin renga Sawrkar chawmdawl a, puia, phungbawm thintu  chu YMA a ni a. YMA hi Mizoram leh Mizoram te tan a hlu tak zet a ni a ti. Home Minister chuan a that laiin YMA-ah a phak ang tawka hun a lo hman ve tawh dawn te a sawi hmasa a. Tunlaiah a hming chauh a YMA member ni ta deuh mai te thalai zingah an tam tawh a. YMA thil tum, dinchhan leh ziarang te hi YMA day pual hian kan bih chian thar leh tawh a hun a ni a ti.

 YMA thupui, " Ram leh Hnam humhalh" chungchangah a pawimawh ber chu thaite an ni a. 'Thalaiah pawh tlangvalte an ni a, tlangval rual ram leh hnam tana innghahna tur zu leh ruihhlo avanga an thi zung zung mai chu chu a manganthlak takzet tih a sawi. Ruihlo hi kan hnam hmelma a ni a, Ram leh Hnam kan humhalh dawn chuan kan hmelhma kan hneh hmasak a ngai a. Chuvangin, keimahni zu leh  ruihloah kan fihlim a nih pawhin duhtawk lo ila, kan chhungte himna tur te, kan thiante himna tur leh kan khawtlang himna tur thlengin mitin te hmala turin kan insawm", a ti.

Hmeichhiat mipatna kawngah kan inthlahdah avangin kan thalai zingah leh nu leh pa bakah pawisawi lo naupang thlengin natna tihbaiawm tak AIDS/HIV in bu khuar mek a. Rinloh deuh deuh te vei an awm nuk tawh a. Hemi kawngah hian kan rilru kan insiam that a ngai a ti.

Ram leh Hnam humhalhna atana pawimawh dang chu intodelh tumna rilru put - midangte leh sawrkar chunga innghat mai lova, mahni tih theih apiang te a thawha thawh chhuah tum leh rilru thianghlim put a ni a ti. Sawrkarin ti vek tura rilru kan put chhung chu hmasawn kan harsat dawn a. Home Minister chuan kan Ram leh Hnam humhalh turin  kan Pi leh Pu ten intodelh tumna rilru ang kha neih leh a pawimawh tih a sawi bawk a ni.

Kumin YMA Day lawmna hun, Hmunpui YMA buatsaih ah hian  YMA Day Urlawk zan, Chawhma, Chawhnu leh Tawpzan program te a hrang vekin siam a ni.