829/2024-2025

Dated Serchhip, the 15th June, 2024: Chhiahtlang YMA Branch zawng zawng te intelkhawmna Chhiahtlang YMA Co-ordination Committee buatsaihin vawiin khan Ramlai Community Hall-ah YMA Day 89-na lawmna hun neih a ni a. PWD Minister Pu Vanlalhlana chu khuallian a ni.

PWD Minister Pu Vanlalhlana chuan YMA chu mitin huapzo; kohhran, politics leh pawl awn bik nei lo; Kristian nun dan tha chawisang a, khawtlang nun khalh ngiltu; tanpui ngai te tanpuia, pachhiate dawm kang tu pawl ropui a ni, a ti a. Chhiatni thatni ah YMA an tangkai em em a, rikrum thil a lo thlen pawhin Sawrkar tha ti chaktu an ni a, Cyclone Remal in Mizoram chhunga chhiatna nasa tak a thlen lai pawh khan YMA te an tangkai em em a ni, Minister chuan a ti.  Hmalam pan zel tur kan nih angin YMA Day ah hian nakin lawka kan ram hruaitu tur thalaite hnenah chakna leh beiseina kan pek a ngai tiin kalkhawmte a fuih a. Harsatna chi tin rengin min bawm a nih pawhin beidawng mai lo a, tumruhna nei zawk turin a chah a.  Sawrkar sum harsatna karah pawh thalai mahni kea din tum te chu sawrkarin theihtawp chhuaha dawm kan leh tuam hlawm a tum tih PWD Minister chuan a sawi a ni.

Pu Vanlalhlana chuan kum 25 liam taah Lungpho bial a nih laiin Chhiahtlang chu MLA anga a bial a nih thin thu a sawi a .Vawiin thlengin Chhiahtlang khua chu a ngainain, a thinlungah an lian reng a ni, a ti a. Chhiahtlang khaw pum YMA Branch intelkhawmin YMA Day ropui taka an lawmna ni pawimawh takah khualliana an sawm chu lawmawm a tih thu sawiin Chhiahtlang khaw mipui te duhsakna a hlan a, YMA Co-ordination Committee hnenah cheng 20,000 a hlan bawk a ni. Tuikum Bialtu MLA Pu PC Vanlalruata, Agriculture Minister chuan Chhiahtlang khaw mipuite YMA Day chibai a buk thu Pu Vanlalhlana hian a sawi a, an bialtu MLA hian Chhiahtlang khaw chhung Branch tin te hnenah silpaulin a thawn bawk a ni.

Chhiahtlang khaw chhungah hian Branch YMA panga - Kawng Veng, Zotuithiang, Hmar Veng, Chanmari leh Chhim Veng Branch YMA te an tel a. YMA Co-ordination Committee ah inchhungkhawmin hmalakna pawimawh tak tak an neih zingah NH-54 kawngpui zauh chungchanga sawrkar leh company dawr te, ramngaw humhalh kawnga an hmalakna te, chhiatni thatni leh rikrum thila pheikhai ruala khaw pumin ke an pen theihna tura tanlak te a tel a. YMA Branch pangate khaikhawm tur leh khawtlang huapa YMA anga hmalak tul thila hma la tura din a ni. 

YMA Day lawmna hi Pu R Lalhnuna, President, YMA Co-ordination Committee chuan a kaihruai a. Central YMA CEC member Pu K.Lalrinawma chuan Kumpuan thupui ‘’Ram leh hnam humhalh' chungchang sawi zauna leh inzirtirna hun a hmang a. Branch YMA pangate hian “Phungrual an tin ang a”  tih leh “Damlai tuipui fawn piah lamah chuanin” tih hla te hmangin Lengkhawm Zai intihsiak an nei a ni.

Chhiahtlang YMA Co-ordination Committee ten YMA Day lawmna an buatsaihah hian hnam lam chi hrang hrang leh zai te, lemchan leh recitation te ngaihthlak leh thlirho a ni a. Kum June 15, 2023- June 15, 2024 chhunga an member boral ta mi sawmpakhat (11)-te sunna hun an hmang a. Chhiahtlang khaw chhunga tlawmngai pawl - MUP leh MHIP te, Village Council member te, YMA leh YMA chhang member-te an tel a ni.