828/2024-2025

Dated Biate, the 15th June, 2025: Vawiin khan Biate Branch YMA te chuan Zialung Community Hall, Biateah YMA Day, 2024 lawmna an buatsaih a. Chief Minister Pu Lalduhoma chuan a telpui.

Thusawiin Pu Lalduhoma chuan, Pastor 41 zet lo chherchhuak tawh, MLA 7 leh MP 1 lo hring tawh, Mizo pa lar Pu L. Malsawma Colney khua, Mizorama khaw fai ber lawmman vawi 6 la thei; Biate Branch YMA in YMA day hmang tura min sawm avangin ka lawm a. Mizoram leh khawvel ram danga awm mek YMA member zawng zawng te Biate tlang atangin YMA day chibai ka buk a ni. Khaw inlungrual leh thawkho thiam, faina ngaina leh khaw taima in nihna te a entawn tlak hle mai. Hmasawn zawng zelin kal ang che u, tiin a fuih.

Chief Minister hian, khawtlang nunah chona kan hmachhawn nasa em em a. Khawtin leh vengtin branch YMA ten mahni zawnah theihtawp chhuaha kan beihlet loh chuan ram leh hnam tichhe thei thil an ni. Tui leh leilung kan enkawl danah insiamthat kan ngai a, nun thlahdah vanga kum naupang taka thihna te, nupa inthenna te, HIV/AIDS te, Cancer te a tam hle a. Ruk ruk a hluarin, thalai vakrawlai kan tam tual tual. Tin, pi leh pute atanga kan neih zo nun ze mawi te a boral nasa ta. Hawh u, i din thar leh ang u, mitinin mahni zawnah mawhphurhna ka nei vek a ni, tiin YMA member te a sawm a ni. 

Biate Branch YMA ten mi harsa, in luah tur hmu mai lote tlanluh lailawkna tur an sak mek puih nan Rs. 3,00,000 a pe a. An mamawh dang te chu a theih anga a bawhzui tur thu a hrilh bawk.

Chawhma inkhawm hi Tv. B. Lallawmawma, President in a kaihruai a, Pastor Jonathan Pachuau in hunserh a hmang a. VCP Pu C. Lalringliana'n thu a sawi bakah zirlai hlawhtling chawimawina te, YMA thuthlung sawi rualna te, kumpuan pual thusawi te, member boral sunna te an nei a, section zaipawl inelna pawh an nei a ni. Biate Branch YMA ah hian member 1133 vel an awm mek a, section pathumah an inthen a ni. 

Chawhnu lamah hun hlimawm tak an hmang zui leh bawk.

Chief Minister hi Pu JK Dawngzuala, Chairman, ZIDCO chuan a tawiawm a ni.