827/2024-2025

Champhai, the 14th June, 2024: Association for Voluntary Blood Donation (AVBD) leh District Hospital Champhai tangkawp buatsaihin vawiin khan Champhaiah World Blood Donor Day 2024 hman a ni a. He hun hi Dr. PC Lalhmingliana, Senior Chief Medical Officer, Champhai District chuan khuallian niin a hmanpui.

I&PR Auditorium, CHAHEM building-a hun hmanah Khuallian Dr. PC Lalhmingliana, Senior Chief Medical Officer, Champhai District chuan khawvel thiamnain a siam chhuah theih loh thisen hlu tak, a thlawna pek chu hmangaihna leh lainatna lan chhuahna a ni tiin, a thlawna thisen pe thinte chuan chawimawi an phu hle a ni, a ti a. Kumin World Blood Donor Day thupui  'Thank You, Blood Donors' tih chuan a mamawhte hnena thisen pek uar leh mihring nun chhan nana thisen hlutna a keng tel a ni, a ti bawk.

Khuallian chuan Champhai District-in a mamawh apiangte tana hman atana pawl anga thisen pe thintute chungah lawmthu a sawi bakah thisen kan pek unit khat hian a nih dan tura dik taka kan hman chuan mihring nunna pathum a chhan theih thu a sawi a. Champhai District-ah raltlan avangin thisen mamawh a tam zual tih sawi bawkin, Mizote hi midangte tana inpe, tlawmngaihna thuk tak nei kan ni a, kan Kristianna nen pawha inhmeh em em a ni, a ti a. Midangte tanpuitu leh mamawhte hnena inpekna nun nei zel turin kalkhawmte chu a chah bawk a ni.

Kum 2023-2024 World Blood Donor lawmna hunah hian category hrang hranga thenin mimal, pawl leh kohhran hrang hrang thisen pe hnemte hnenah chawimawina hlan a ni a. Kum 2023-2024 chhunga mimal thisen pe upa ber Pu C. Zohmingthanga (58) Champhai Vengsang bakah hmeichhe zinga thisen pe tam Pi F. Lalchhandami, Champhai Vengthlang (unit 35), Pi Chawngziki, Champhai Vengsang (unit 33), mipa zinga thisen pe tam Pu PC Lalchuangkima, Champhai Bethel (unit 90), Pu C. Zoremsiama, Champhai Vengthlang (unit 50), Pu Lalmuanzova, Champhai Zotlang (unit 47) leh Pu F. Zomuankima, Champhai Venglai (unit 42) te chawimawi an ni a.

He huna tarlan a nih danin kohhran hmingin kum 2023 - 2024 chhung khan AYF Champhai North-te chuan thisen vawi thum an pe a, Zotlang North Branch KTP leh AYF Champhai South te'n thisen vawi hnih ve ve an pe a, Bethel Pastor Bial TKP, Church of God PKTP, Vengsang Pastor bial KTP, Khuangleng Pastor bial KTP,  TKP Kahrawt Unit, Joint PYD (NEI), Neihdawn Branch KTP,  Kahrawt Pastor bial KTP, TKP Bethany Unit leh Tuipui Branch KTP ten thisen an pe a. YMA hmingin Joint YMA Hnahlan, Sub-Headquarters YMA Champhai leh Bungzung YMA ten thisen an pe a. Educational Institution hmingin NSS GM HSS leh NSS Govt. Champhai College ten vawi hnih pein NCC Govt. Champhai College leh DIET Champhai ten thisen an pe bawk a, Khawzawl Police (DET), Champhai Police (DEF) leh MNYF Champhai Joint Block ten thisen hi an pe bawk a ni.

World Blood Donor Day programme hi Pu C. Zaihmingthanga, Secy, AVBD Champhaiin a kaihruai a. Dr. PC Lalawmpuia, Medicine Specialist, District Hospital Champhai leh Dr. Krossnunpuii, BBO, District Hospital Champhaite hnen atangin thusawi ngaihthlak a nih hnuah Pu PC Lalchuangkima, Asst. Secy. AVBD Champhai chuan lawmthu sawiin he hun hi a khar a ni.