826/2024-2025

Champhai, the 14th June, 2024: Animal Husbandry & Veterinary Minister Pu C. Lalsawivunga chuan vawiin khan Champhai District chhunga AH& Vety. Department hmunhma pawimawh tak tak Live Animal Market Ruantlang, Khuangleng leh Khawbung Dispensary bakah Samthang khuate a tlawh a, Department thawktute, khawtlang hruaitute leh ran vulhtute a kawm.

AH & Vety. Minister Pu C. Lalsawivunga chuan sawrkar chu kuthnathawktute lamtang a nih thu leh Champhai District a tlawh chu kuthnathawktute pual a nih thu sawiin, Department hmalakna leh hmasawnna ruhrel siamte chu kuthnathawktute tana siam a ni, a ti a. Department hmalaknate leh ran vulhtute dinhmun dik tak chu ral thlir mai lova a hmun ngeia enfiahin hlawkna tam tak a pek thu a sawi a. Khawchhak tlangdung chu ranvulh lama tui leh theihna nasa tak nei a nih thu tarlangin, AH& Vety. sector hnuaiah a theih chin chinah khawchhak tlangdungah theihtawp chhuaha hmalak tum a ni, a ti bawk.

Pu C. Lalsawivunga chuan Department-in ran chaw siam nan Vaimim Kg ah 25/- velin a lei thin tih sawiin, ran chawa intodelh tur leh kuthnathawktute'n hlawkna an tel theih nan Champhai District-ah pilot project-a Vaimin leh Bekang chinkawp tum a nih thu a sawi a. Vaimim Kg khat Rs 25/- vela lei bakah support price Rs 3-4 vel bawr pe thei tura ruahmanna siam a ni, a ti a. Mipuite chu a thlawna sem leh dawn beisei lova mahni thawhrah hmanga intodelh ngaisang turin a fuih a. Art & Culture Minister ni bawk chuan Hla Kungpui Mual behchhanin thu leh hla kutpui nei tura inrawnkhawmna neih a nih thu leh puitlin a nih ngei a beisei thu a sawi a. Sawrkar chu kuthnathawktu lamah a tang zel dawn tih sawiin, mipuite chu dikna, rinawmna, taimakna leh thawhrimna nena ram siam tha tura sawrkar thlawp tlat turin a chah bawk.

AH & Vety. Minister Pu C. Lalsawivunga chuan tukin khan Live Animal Market, Ruantlang tlawhin hmalaknate a enfiah a. Hmunhma leh hmanraw tha tak awmte chu tangkai zawka hman a nih theih nan ngaihtuahna sen a nih tur thu a sawi a. He huna Minister tawiawmtu District Bawrhsap Pu James Lalrinchhana pawhin sawrkarin mumal taka hnathawh a tum thu leh thawhhona a ngaihpawimawh thu a sawi bawk.

Heng bakah hian Pu C. Lalsawivunga chuan vawiin chawhma khan Khuangleng Veterinary Dispensary leh Khawbung Veterinary Dispensary-te tlawhin Department thawktute leh khawtlang hruaitute a kawm a. Chawhnu lamah Samthang tlawhin khawtlang hruaitute leh Samthang Farmers' Association-te a kawm a. Samthang Zopui Sevulh Association te'n ama pual chawimawina hun an buatsaih chu a telpui bawk a, harsatna leh mamawh thlente chu a theih ang zela hmalakpui a tum thu a hrilh a ni.

AH & Vety. Minister Pu C. Lalsawivunga hi Dr. B. Lallawmsanga, DAH&VO, Dr. Robert Rualthankhuma, Dy. Director (Planning), Pu N. Lalzarzova, BDO Khawbung, Dr. Lallawmkima, DIPRO leh Pu Vanlalhuma Singson, Archaeologist, Art & Culture Department te'n an tawiawm a ni.