734/2024-2025

Champhai, the 10th June, 2024: Vawiin chawhma dar 10:00 khan Adviser to Chief Minister (Technical) Er. H. Ginzalala, Champhai North bialtu MLA chuan CHANEM building, Champhai Vengthlangah 'Skill Development & Entrepreneurship Incubation Centre' a hawng.

Adviser to CM (Technical) Er. H. Ginzalala chuan Skill Development & Entrepreneurship Incubation Centre, Champhai hawn a ni chu lawmawm a tih thu sawiin, puitlin a nih theih nana DC Office hmalakna fakawm a tih thu a sawi a. Office mai bakah training neihna tur a nih thu tarlangin, a chhung bungrua mamawh angte DC Office-in a ngaihtuah chu lawmawm a tih thu a sawi bawk a. Enkawla thutchilh tur mi fel tak 2 dah thuai a nih tur thu leh Incubation Centre chu idea thawhkhawmna tur hmun a nih thu sawiin, hmalak zelna turah line department hrang hrang hotute finchhuahna leh tawiawmna a ngen a. Champhai District chu Entrepreneurship huanga theihna nasa tak nei a nih thu sawiin, entrepreneurship chu engmah lo atanga bultana hlawhtlinna chang thei tura hmalakna, eizawnna ngelnghet nei tura kawng inkawhhmuhna leh hmalakna a ni, a ti bawk.

Champhai North bialtu MLA ni bawk chuan Skill Development & Entrepreneurship Incubation Centre, Champhai chu tu ta mah a nih bik loh thu leh a hmang tangkai duh apiang tana malsawmna ni tura hawn a nih thu sawiin, entrepreneurship lama hmalakna kawnga a tih theih ang apiangte he hmunah hian buaipui a ni ang, a ti a. Entrepreneur-te'n harsatnate remchannaah hmang zawkin hlawhtlinpui nan an hman thu sawiin, Incubation Centre chu thiam zirna hmun pawimawh tak, hmalak dan tur inkawhhmuhna atana ruahman a ni, a ti a. Economy chawikan nana pawimawh tak  entrepreneurship chu Sawrkar hmalakna 'Handholding Policy' hnuaiah ngaihpawimawh a nih thu a sawi bawk.

He hun hi Pu K. Zorammuana, Addl. DC Champhai chuan kaihruaiin kalkhawmte lawmna thu a sawi a. Skill Development & Entrepreneurship Incubation Centre atan DC Office atangin office mamawh item 37 dah a nih tur thu a sawi a. Pu Lalruatpuia, PS to Adviser to CM (Technical) in Skill Development & Entrepreneurship Incubation Centre awmzia leh kalphung bakah hmalak dante a sawifiah a. Pu Vanlalpara, DMO -in Incubation Centre atana hman tur white board, Commerce & Industries Department, Commerce Wing atanga thilpek  hlanna hun a hmang a. Pu Lalrinawma, PD, DRDO Champhaiin lawmthu sawiin hun hman a khar a ni.

Skill Development & Entrepreneurship Incubation Centre, Champhai hi CHANEM building chhawng 3-naah a awm a, Champhai District hmasawn nana ngaihpawimawh tak, eizawnna tlak ni thei tura thalaite thiamna chher hriam, tihpun leh entrepreneurship lam hawia hmalakna peng pawimawh tak a ni. 

Adviser to CM (Technical) Er. H. Ginzalala chuan tukin khan Champhai Bazarpui tlawhin bazar tihchangtlunna tur hrang hrangte a enfiah a. Felfai zawka thlai zawrhna tur selling platform siamte, bazar himna tur atana security dah dan turte, bazar fai leh thianghlim neihna atana bawlhhlawh paihna hmun tha zawk siam dan turte chu Commerce & Industries hotute nen an en ho a. Bazar tlawh rual hian bazar chhehvel tihhmasawnna tur hrang hrangte leh tuihawk luankawra plastic bawlhhlawh thenfaina tur hmanrua 'Plastic Awt' siam dan turte pawh khawtlang hruaitute nen an en ho nghal a ni.

Adviser to CM (Technical) Er. H. Ginzalala hi Pu V. Lalhmangaiha, DCIO, Pu Vanlalpara, DMO, Commerce & Industries leh staff-te'n an lo dawngsawng a ni.