733/2024-2025

Dated Siaha, 8th June 2024 : Vawiin chawhma dar 11 khan Mara rama tlang sang ber Mawma tlang a 'Ecological Park' hawnna  inkhawm chu  Upper Primary School, Chakhei- I ah neih a ni a. Pi  Lalrinpuii, Minister, Tourism Department chuan  khuallian niin 'Mount Mawma Ecological Park'  hawnna hi a nei a,  Pu V. Lalengmawia, Addl. Secretary, Tourism Department chuan inkhawm hi a kaihruai a ni.

Pi Lalrinpuii chuan kalkhawmte leh Chakhei mipuite  hnena lawmthu sawina neiin, Zofaten tangkai taka an chhawr tur leh a duh apiangte tana tlawh theih turin 'Mount Mawma Ecological Park' chu lawm takin a hawng a. Siaha District chhungah khua 24 a tlawh tawh tih tarlangin, Mara mipuiten lawm taka an lo dawnsawn thinna chu fakawm a tih thu a sawi a ni. Pi  Lalrinpuii chuan a enkawl mek Tourism Department- in hnathawh tur hmachhawp tam tak a nei tiin, a bik takin Mizoram pawn lam atanga Khualzin tam zawk hip tum mek a ni, a ti a.  Siaha district pawhin Tourism department hmalakna hi a chhawr dawn hle a ni tiin, vawiina hawn tak 'Mount Mawma Ecological Park ' pawh hian tlawhtu tamtak neih belh zelin Chakhei mipuiten hlawkna tam zawk an nei dawn a ni, a ti.

Pi Lalrinpuii chuan Siaha district chhunga khaw then khat Community Hall  la nei lo te tan theihtawp a chhuah mek tih a sawi a. Mi tam takin an tlawh fo thin 'Beino Caslte'  panna kawng laihna turin Asian Development Bank (ADB) atanga sum leh pai hmuh a beisei awm hle tih a tarlangin Mizoram sawrkarin Mara mipuite a theihnghilh ngai dawn lo a ti a. Sawrkar chu Mizoram mipuite tana awm a nih  angin mipuite sawrkara rinna nghat ngam turin a chah bawk.

Tourism Minister chuan 'Mount Mawma Ecological Park' siam hna thawk  tura thlan M & M Construction & Consultancy- ten hna tha taka an thawh theihna tura  khawtlang mipuiten theihtawp an chhuah chu fakawm a tih thu a sawi a. Contractor pawhin khawtlang mipuite rawn chung zela hna a thawh bakah hnathawk tura khawchhung mi leh sa tamzawk chhawr a ni chu a entawn tlak hle a ni, a ti . Chakhei mipuite leh Contractor-te inkarah thawhhona tha tak a awm avangin hna tha tak leh a hun takah zawh a ni a ti a, hetianga thawhhona tha hi midangte pawhin ching thar zel se a duh thu a sawi .  Chakhei mipuite chu neitu thinlungpu chung zela  'Mount Mawma Ecolgical Park' enkawl tlat tur a fuihin Pi Lalrinpuii chuan hmalam hunah duhsakna sang ber a hlan nghal.

Pu K. Lalruatsanga, Asst. Engineer, Tourism Department chuan technical report pekna a nei a. Report atanga a lan danin, Mount Mawma Ecological Park, Chakhei siamna tur hian North Eastern Council (NEC) atangin cheng nuai 236.17 hmuh niin, M & M Construction & Consultancy, Ramhlun Vengthar, Aizawl ten hna hi an thawk a. Ni 1, April 2023 atang khan hna thawh tan niin Ni 5, February 2024 khan hna hi thawh zawh fel a ni . Mount Mawma Ecological Park -ah hian Trekking/Hiking route- Mawma tlang chhip thlengin Cubic lung hmanga steps siam a ni a, Trekking/ Hiking route- ah hian chawlhhahdamna tur (Waiting/Rest shed) pathum siam tel a ni bawk. Suspension bridge pawh siam niin, Camping Ground- panga bakah Watch Tower leh Entry Gate- te siam tel a ni a.  Wildlife Enclosure- Birds net-128, fencing- 946 m, Artificial Pond- 1 siam niin, Orchid-460 phunthar a ni bawk.

Vawiin 'Mount Mawma Ecological Park'  hawnna inkhawmah hian MTP Headquarters, MTP Sub- Headquarters, Chakhei  leh Mount Mawma Research and Development Society (MODESTY)  te hnen atangin thusawi tawi ngaihthlak a ni bawk a. Pi C. Ramsangzuali, Tourist Officer chuan 'Responsible Travel Pledge' sawihona kaihruaiin  Pi R. Lalrodingi, Director, Tourism Department chuan lawmthu sawina neiin inkhawm a khar.