Nizan (17.8.2013) khan Pu Zodintluanga, Sports & Youth Services Minister chuan Police Headquarters Arya Mess, Khatla-ah Mizorama a vawikhatna tur "Asian Football Confederation 'B' Licence Coaching Course" a hawng.
Pu Zodintluanga chuan he course pawimawh tak Mizoram Football Association (MFA)-in a thleng chu lawmawm a tih thu sawiin,rah tha tak a chhuah ngei a beisei thu a sawi a. Mizote chu infiamna ngaina hnam kan nih thu leh infiamna hrang hrangah state leh India ram aiawha fehchhuak Mizote'n hlawhtlinna ropui tak tak an hmuh thin thu a sawi bawk. Mizoram-a Sports Academy kan neihte chu tangkai taka kalpui zel an nih thu sawiin, thalaite infiamna kawnga an tuihalna hre reng chungin infiamna hmunhma tha leh rotling siam chhoh mek zel anih thu a sawi a. Mizoramin reiloteah phul lem phah (artificial turf) panga a neih tur thu sawiin, tuna kan neihsa pathumte bakah hian, a palina tur Champhai Chhangphut field-ah kalpui mek anih thu leh,a pangana tur pawh sorkar laipuia Ministry of Youth Affairs & Sports-in a pawm tawh thu a sawi bawk.
He hun hi Pu Lalnghinglova Hmar, MFA Honorary Secretary chuan a kaihruaia, Pu Lal Thanzara, MFA President leh Parliamentary Secretary ni bawk chuan inlawmna thu sawiin, MFA-in Mizorama a vawikhatna atana AFC 'B' Licence Coaching Course a thleng chu lawmawm a tih thu leh, India ram mai bakah, Mizo infiammite'n an hlawkpui ngei a beisei thu a sawi bawk.
He AFC 'B' Coaching Course vil tur hian, Vincent Subramaniam, AFC Elite Coaching Instructor leh Scott O'Donnell, AIFF Academies Technical Director-te an lokal a. Mizoram chu football-in hma a sawn zel nana a taka thawk thintu anih avanga he training hi thleng anih thu an sawia. India ramin football-a hmasawnna bung thar a kai theih nana AIFF hmachhawpte tihlawhtling turin football player tha tak tak chherchhuah a ngai a ni, tih hrereng chunga he coaching course hi buatsaih anih thu an sawi bawk.
India ram hmun hrang hrang atangin training tur hian football coach 24 an lo kala,an zinga pathum hi hmeichhia niin, Mizoram atangin mi pariat an tel bawk. He course hi 18 August, 2013 ah tan a ni anga, 6 September, 2013 thleng a awh ang.
