452/2026-2027

Siaha the 11th May 2026: District Magistrate Pu VL Hruaizela Khiangte chuan a hnuai tarlan ang hian Vawk hri (African Swine Fever) chungchanga Siaha mipuite hriattur thuchhuah a siam.

ORDER

District AH & Vety. Officer, Siaha District, Siaha hnen atanga ngenna kan hmuh angin hun engemaw chen Vawk natna hri hlauhawm tak African Swine Fever (ASF) in min kiansan hnuin khua a ro in a rawn lum chho leh hle tawh mai a, District thenkhat Aizawl leh Saitualah te Vawk thi report a awm leh tawh a, kan District ah pawh Vawk kan vulh chho leh tan mek a ni a, kan Vawk neih chhun chhun te, he hri hlauhawm tak atanga an lo him theih nan khuahkhirhna thupek 'ORDER' chhuah alo tul leh ta a.

Chuvangin, kei, VL HRUAIZELA KHIANGTE, DISTRICT MAGISTRATE, SIAHA DISTRICT, hian Section 163 of Bharatiya Nagarik Suraksha Sanhita, 2023-in thuneihna min pek angin, hetiang hian thupek ka chhuah e.

1. Siaha District huamchhungah, Ram dang, State dang leh District dang atangin Vawk, Vawksa leh Vawksa atanga eitur siam chi reng reng lakluh khap tlat a ni.

2. Siaha District huamchhung khua leh khua inkarah Vawk, Vawksa leh Vawksa atanga eitur siam chi reng reng inlakpawh tawn khap tlat a ni.

3. Vawk damlo reng reng talh khap tlat a ni a, Vawk damlo chu dah hran vat tur ni.

4. Vawk damlo nei te'n arang lamin AH & Vety Hospital, Govt. of Mizoram, Siaha ah emaw mahni Khua/Veng/VFA/VC/Task Force te hnenah hriattir vat tur a ni.

5. Vawk alo thi anih chuan mahni duhduhna ah paih mai lovin Disinfectants, Chinai leh Bleaching etc. nen thuk taka phum tur a ni.

Hemi dan bawhchhetute chu Section 223 of Bharatiya Nyaya Sanhita, 2023 hmanga na taka hrem an ni ang.

He thupek hian chhuah a nih atanga thla hnih (2) chhung a huam ang.

He thupek hi nemnghetin vawiin ni 06th May, 2026 hian hming ka ziah hnan e.