No.6743/2020-2021

Dated Champhai, the 2nd December, 2020:  A.H & Vety.  Department Champhai chuan vawiin khan thuchhuah siamin, Vawk pulhri natna hlauhawm tak African Swine Fever (ASF) chu  thenawm ram Myanmar-ah lengin vawk tam tak an thi tawh  tih Tahan Daily News-ah puan anih thu leh  thenawm State Manipur-ah ASF ni ngeia rin lengin farm tam takah vawk thahnem tak a suat mek thu chhuahin,  African Swine Fever chu vawk pulhri  a  tihdamna  leh  vaccine pawh awmlo, a veite 100 % thleng thih theihna Vawk hri hlauhawm tak anih thu mipuite a hriattir nawn leh a ni.

Dr. B.Zonghinga, District  A.H & Vety. Officer (DVO) Champhai chuan  ram dang leh state dang atanga vawk, vawksa leh vawksa atanga siam reng reng lakluh khapna Champhai District Magistrate-in thla hnih chhung atan October Ni 21, 2020  (Vide No.J.11012/1/2014-DC (CPI)/ of Dt. 21St,October, 2020)  ah a chhuah thu tarlangin, khapna thupekah hian District chhung khaw pakhat atanga khaw dang emaw, Mizoram District  danga thawnchhuah emaw, lakluh emaw chu vawkvulhtute'n harsatna an tawh loh nan khap tel anih loh thu a sawi a. Khua leh khua, District leh District-a vawk lalut/thawnchhuakturte chuan an vawk leinate hnen atangin receipt fel tak an nei thung  tur a ni a, chu chu VC leh YMA leh A.H & Vety. Department  hotute, A.H & Vety. Department   awmlohna khuaah erawh chuan Community Animal Health Worker (CAHW) te’n an hriatpui ngei ngei tur a ni, a ti bawk. Heng vawk leina lehkha leh hriatpuitu tur pathum (3);  VC, YMA leh  A.H & Vety. Department-te lehkha tello chuan vawk phurhkual hi phal a nih loh thu leh khapna dan bawhchhiate chu IPC Sec. 188 hmanga hrem theih an nih thu a sawi bawk.

DVO Champhai chuan  Vawk hri hlauhawm  tak African Swine Fever (ASF) in Champhai District-a lo luh lohna turin mitinte fimkhur turin a chah nawn leh a. Vawka  eizawngtute pawh khapna thupek zawm hram hram tura  ngenin a hriattir nawn bawk a.  Kan vai atana pawimawh leh tha tur a nih avangin ASF hrileng hlauhawm zual hun chhung hi chuan khapna thupek hi zawm hram hram turin kan inngen a ni, a ti bawk.