1992/2024-2025
Khawzawl, dated 10th September, 2024: Khawzawl Deputy Commissioner, Pu K. Vanlalthiana chuan African Swine Fever (ASF) leng mek chungchangah hetiang hian thuchhuah a siam:
"Tunlai hian Mizoram hmun thenkhatah African Swine Fever (ASF) natna leng mek chuan kian lam a la pan thei lo a, he hri laka Khawzawl District mipuite kan fihlim theihna tûrin a hnuaia târlan ang hian khuahkhirhna thupêk chhuah a tul a.
Chuvangin, kei, K. VANLALTHIANA, DISTRICT MAGISTRATE, KHAWZAWL DISTRICT chuan Section 163(1) BNSS, 2023 in thuneihna min pêk angin a hnuaia thupêk hi ka chhuah e :-
* Khawzawl District huam chhungah India ram pawn leh ram chhung State dang leh District dang atangin vawk, vawksa leh vawksa atanga siam thil rêng rêng lâkluh leh thawn chhuah phal a ni lo.
* Vawk damlo reng reng talh leh hralh khap tlat a ni. Vawk damlo reng reng chu dah hran vat tur a ni. Vawk thi reng reng thuk taka phum bo tur a ni.
* Vawk damlo leh thi a awmin District AH & Vety Department Official-te hnenah report vat thin tûr a ni.
* Khawzawl District chhunga khua leh khua inkarah vawk inlakpawh tawn khap tlat a ni. Infected Area a puan khua atangin vawk lakluh leh lakchhuah khap tlat a ni.
* Tualchhung vawk talh tur reng rengin vawk hrisel tha ngei a ni tih finfiahna competent authority atangin an nei ngei tur a ni.
He thupêk zawm lote chu Section 223 BNS hmanga hrem theih an ni ang. Tin, he khapna thupêk hian thupêk dang tihchhuah a awm a nih loh chuan, thupêk chhuah a nih atanga thlahnih chhung a huam ang.
Tin, he thupêk hi vawiin Ni 9 September, 2024 hian District Magistrate Seal-a nemin ka hming ka ziah hnan e."
