1993/2024-2025

2024 Mimkut thla ni 10: Lunglei Government College (LGC)-in an college kum 60 tlin, Diamond Jubilee lawmna hun an buatsaih chu vawiin khan an college Auditorium-ah Mizoram Sawrkara Health & Family Welfare (H&FW) Minister, Pi Lalrinpuii chuan Khuallian niin a hmanpui a. Lunglei West bialtu MLA Pu T. Lalhlimpuia chu khual zahawm a ni.

LGC Diamond Jubilee hriat rengna atana college tuala monument buatsaih chu Khuallian Pi Lalrinpuii hian a hawng hmasa a. Khual zahawm, Lunglei West bialtu MLA Pu T. Lalhlimpuia chuan a MLA Fund aṭanga a saksak, LGC Diamond Jubilee hulhliap (shed) chu a hawng ve bawk a. Hemi hnu hian Khuallian, khual zahawm leh College Principal te chuan diamond jubilee hawnna atan balloon an thlawh chhuahtir nghal bawk.

LGC Auditorium-a Diamond Jubilee lawmna inkhawm buatsaihah Khuallian Pi Lalrinpuii chuan LGC-in Pathian kaihhruaina avanga kum 60 a tling ta chu lawmawm a tih thu sawiin, kal khawmte chu diamond jubilee chibai a buk a. Mi thiam, rilru changkang leh zirna lama rual awt em em, Lungleia college bul lo ṭantute zahna chibai bukin, an hna thawh chu theihnghilh a ni dawn lo tih a sawi a. Chu'ng mi hmasate thawh rah avang chuan college-in hmunhma ṭha tak a neih piah lamah tun hnu zela thawktute inpekna avangin college pawhin hma a sawn zel a, mi thiam leh mi hlawhtling tam tak chher chhuah an ni tawh tih sawiin, LGC chu ram tana zirna in chhenfakawm tak ni zel turin duhsakna a hlan a. Zirna chuan mimal nun, chhungkaw nun, khawtlang leh kohhran a nghawng avangin zirtirtute chuan an pawimawhzia hria a, zirlaibu zirpui piah lamah mi puitling, mi invawng leh chhungkua, khawtlang leh kohhran tana mi ṭangkai ni tura zirlaite chher chhuah tum zel turin a chah a ni.

Khuallian chuan nuam tih zawng (hobby) ni mai lova chin ṭhan (habit) ṭha nei turin zirlaite chu fuihin, mahni inthunun theihna (self discipline) nei tur te, zing taka tho va, insawizawi ṭhin tur te, rilru pe ding taka an zirna leh an thil tih reng reng bei tur te leh ni tin hun bi fel tak insiam a, thil ṭangkai tih nan leh daihzai taka hun hmang ṭhin tur te'n a chah a. Ṭhalaite chu intihhlimna hmunhma chungchangah an rual awt tih sawrkarin a hria tih sawiin, Tourism department kal tlangin kan ram mawina neih sa, thing leh mau, tlang leh lui leh kan kut ropui tak takte chu khualzin hipna leh sum lak luh nan hman tum a ni, a ti a. Zirlaite chu kan ram mawina ngaihlu a, tlawh uar tur te, pi pute'n ngaihsan leh ngaihhlut tur dik an lo kalpui ṭhin chhunzawm thar tur te, ram, khawtlang, kohhran, chhungkua leh mimalin kan neih sa ngaihlu a, a hlutna belhchhah tura hma la zel tur te'n a chah a. Ruihhlovin kan ramah ṭhalaite leh chhungkaw tam tak a tibuai tih sawiin, ruihhlo do chu mimal leh chhungkua aṭanga bul ṭan a pawimawh, a ti a. Ruihhlo laka fihlim tur te, an lo ti tawh a nih pawha sim tuma ṭan la tur tein zirlaite leh kal khawmte chu a chah a. LGC diamond jubilee lawmpuina atan thuziak leh pawisa fai ₹ 20,000/- a hlan nghal bawk.

Khual zahawm Pu T. Lalhlimpuia chuan LGC chu chhim lama college hmasa ber leh Mizorama pahnihna a nih angin Mizoram zirna atan a hlu hle tih a sawi a. LGC bul ṭantute leh college-a thawk tawh zawng zawngte an hun, tha leh theihna senga an inpekna chhuanawm a tih thu sawiin, college hlawhtlinna zawng zawng chu an thawh rah a ni, a ti a. LGC chu mi hlawhtling tak tak chher chhuak tawhtu a nih angin zirlai ni mekte pawh inchhuang taka zir tura chahin, tihdan phung thar ṭha zawk leh tun lai thiamna te'n an tana remchanna a chhawp chhuahsak chu hman ṭangkai tum turin zirlaite chu a chah a. Ram damna atana damdawi kan neih ṭhat ber pakhat chu zirna a ni tiin, zirna kal tlanga ram intodelhna leh hmasawnna tura rilru seng a, theih tawp chhuah turin a fuih bawk.

LGC Diamond Jubilee lawmna hun hi Vice Principal Pu Lalrammuana Chawngthu chuan kaihruaiin, Baptist Church of Mizoram (BCM) General Secretary Rev. R. Lalbiakliana'n hunserh a hmang a. LGC Students' Evangelical Union Choir te'n inhlanna hla, "Ro Min Relsak Ang Che" tih sain, Principal Pu C. Zairemthanga chuan inlawmna thu a sawi a. LGC-a Principal lo ni tawhte - Pu C. Hrangdula (2005-2011), Pu C. Hmingliana (2011-2014), Pu R. Lalrosanga (2014-2015) leh Pu LH Rothanga (2018-2023) te'n thu sawiin, LGC-a Principal puitling hmasa ber Rev. Dr C.L. Hminga thu sawi video thlir ho a ni bawk a. LGC aṭanga zir chhuak (alumni)-te aṭangin thu sawi ngaihthlak niin, LGC Alumni Association chuan diamond jubilee lawmpui nan College Principal kutah ₹ 35,000/- cheque an hlan bawk a. LGC Cultural Club te'n hnam lam entirin, Voices of LGC (1st batch 2014) te'n LGC Theme Song "Summa Supremo" an sa a, H. Lalremruati (Maruati Hnamte) a zai bawk.

LGC Diamond Jubilee lawmnaah hian Lunglei South bialtu MLA Pu Lalramliana Papuia bakah, Lunglei Municipal Council-a councillor-te, sawrkar department leh zirna in hrang hranga hotute, sawm bik mi pawimawh tak takte, LGC-a Principal leh thawktu dang leh zirlai chhuak tawhte, District MJA member-te leh LGC-a thawktute leh zirlaite an tel a. Auditorium-a hun hman zawh hian diamond jubilee lawmna ruai kil ho zui a ni a. Diamond jubilee pual hian zan lamah Fashion Show & Concert buatsaih chhunzawm a ni bawk.

Lunglei Government College hi kum 1963 September ni 10 khan mi ṭhahnem ngaite'n "Lungleh College" (Lunglei College) tih hming puin an din a. Gauhati University pawmpuina (recognition) tel lova kum khat kalpui a nih hnuah, Principal puitling hmasa ber atan Baptist Kohhran pastor Rev. Dr C.L. Hminga chu sawm niin, ani ho hian University pawmpuina hmuh a ni a. Principal puitling hmasa ber Rev. Dr C.L. Hminga'n a hna a zawm ni, September ni 10, 1964 hi LGC din ṭan ni atan hman a ni ta a ni.

Tun dinhmunah LGC-ah hian Bachelor of Arts (BA) leh Bachelor of Science (B.Sc) zirna awmin, kum 2024-2025 Academic Session kal mekah zirlai 932 (BA 787 & B.Sc 145) an awm a. Zirtirtu 69 leh thawktu dang (non-teaching staff) 17, an zavaiin thawktu 86 an awm a; College din tirh aṭangin Principal 22 an awm tawh a ni.

LGC-ah hian thawktute'n an hriat theih chinah kum 1964 aṭanga 2024 thlengin BA pass 3,201 leh B.Sc pass 666, an vaiin pass chhuak zirlai 3,867 an awm tawh a. Kum 1996 aṭang khan University Top Ten-a lang zirlai 114 nei tawhin, University Gold Medalist mi 13 an nei tawh a ni.

LGC hian Boys leh Girls Hostel neiin, zirlai eng emaw zat an awm mek a. Diamond Jubilee an lo thlena an thil tum (Jubilee Academic Goal) chu - pass percent sang zawk ni tura ṭan lak, University exam-a Gold Medalist tam zawk chher chhuah leh University exam-a top ten tling pha tam zawk chher chhuah te a nih thu Principal Pu C. Zairemthanga chuan a sawi a ni.