3316/2022-2023
Champhai, the 20th January, 2023: African Swine Fever (ASF) laka Champhai District him tlan nan Champhai District Magistrate, Pu James Lalrinchhana chuan Sec. 144 CrPC, 1973 (Act II of 1973) in thuneihna a pek angin vawiin khan hetiang hian thupek a chhuah:
1) Champhai District chhungah ram dang leh state dang atanga vawk, vawksa leh vawksa atanga siam reng reng lakluh phal a ni lo.
2) Vawk damlo talh khap tlat a ni.
3) Vawk damlo a awm chuan dah hran vat a, vawk thi reng reng thuk taka phum tur a ni.
4) Vawk thi leh damlo an awmin A.H. & Vety Official-te hriattir vat tur a ni.
Thuchhuah chuan thenawm ram Myanmar khaw thenkhatah vawk thi an awm nual nia thudawn anih thu a tarlang a. Vawk natna hri lakah Champhai District chu him angin lang rih mah se, African Swine Fever (ASF) chu state dang leh ram dang atanga rawn thleng leh thei reng anih avanga him tlan nana hmalak a tul thu a tarlang bawk.
Thupek zawm lo tu chu IPC Sec. 188 hmanga hrem an nih theih thu leh thupek chuan chhuah anih atanga thla hnih (2) chhung a huam dawn thu tarlan a ni bawk.
