3315/2022-2023

Aizawl 20th January 2023: Vawiin khan Irrigation and Water Resources Minister Pu C. Lalrinsanga hovin a pisaah JICA Sustainable Farming System ( JIFAS ) chungchang zirhona neih a ni.

Mizoram buh leh bal a kan intodelh theihna turin kum 2013-15 ah JICA leh Mizoram in thawhnona neiin Mizoram dinhmun zirchian a lo ni tawh a, he zirchianna behchhan hian Mizoram tan Master Plan siam a ni a. He Master Plan tihlawhtling tur hian JICA leh Mizoram in kum 2015-2023 chhungin Technical Cooperation Project (TCP) hnuaiah thawhhona nei leh in, he TCP hian Mizoram tana farming system tha ber tura a ngaih JIFAS hi a rawn chhawpchhuak ta a. JIFAS hi Mizoram sawrkar pawmpui tura hmalak mek a ni.

He System thar JIFAS hi Department hrang hrang Agriculture, Horticulture, Land Resources Soil & Water Conservation leh Irrigation & Water Resources department-te thawhhona a ni a. JIFAS in a tum ber chu Kum 2015 atanga kum 2035 Kum 20 chhunga kum tin 4% a ei leh bar dinhmun ti thang zelin Kum 2035 ah chuan ei leh bar ah Mizoramin a tun dinhmun atanga 50% tal a hmasawnna a neih theih nana hma lak a ni.

Zirhona kaihruaitu Irrigation and Water Resources Minister Pu C. Lalrinsanga chuan JICA leh Mizoramin hun engemaw chen Technical Cooperation Project kan kalpui hnuah kan mamawh tak mai Sustainable Farming System kalpui tura hmalakna chhawpchhuah theih a lo ni ta chu a lawmawm tak meuh a ni a ti a. JIFAS system hi Mizoram sawrkarin official taka a pawmpui thuai beisei a ni a, he system-ah hi chuan scheme awm sa anga loneitute hmalaktir satliah lovin, Loneitute mamawhna leh an kutkawiha an dehchhuah theih zawk te kha ngaih pawimawh a ni tawh ang a ti. Line Department hrang hrangin tum inang neia JIFAS hnuaia hna an thawh dawn avangin kan mamawh em em mai Convergence activity chu a takin kan kalpui thei tawh dawn a ni a ti. Minister chuan Intodelh tur hma kan lak mek lai hian kan hmabakah market zau zawk thleng pha tur leh kan economy chawikang tura hmalakna hrang hrang kalpui hi a tul tawh tak meuh a ni a ti a. Chumi tura hmanraw pawimawh leh tul tak zingah he JIFAS system hi kan mamawh ber te zinga mi a ni a ti bawk.

JIFAS hnuaiah hian RD Block 27 huam chhungah CSS fund awm thei ang te hmang tangkaiin a indawt a hmalakna kalpui tum a ni. JIFAS hi I&WRD Minister Chairman-na hnuaia kalpui tum a ni. Loneitute duhdan leh mamawh te line department nen a huho a zirchiang hmasain an hmun leh hma te en puiin a ram in a mil tur ang leh an hlawkpui tur ang chhawpchhuakin Plan fel tak siam ho a ni ang a, loneituten an mamawh ang zelin tlangram hmun nghet leh phaizawl lo neih te chhunzawm chungin tui leh thlai chawmna tura hmanraw mamawhte duang ho in fund awm ang te a tha thei ang ber a hmang tangkai tura hmalak a ni dawn a ni. Hmalakna zawng zawngah line department a thawkte leh loneituten ruahmanna siam hovin kum 5 chhung atana ruahmanna an siam bakah kum khat chhunga an hmalak dan tur plan fel tak an siamho ang a. Heng plan siamte hi uluk taka an vil bakah a hun tak leh dik taka tih a nih theih nan an enpui reng ang. Hetianga Bottom-up approach leh convergence planning hi kal pui tawh chin ah a hlawhtling hle a, Mizoram puma kalphung thar a hman turin ruahmanna kalpui mek a ni.

Vawiina JIFAS chungchang zirhonaah hian Minister chu Er, Lalrotluanga, CE, I&WR leh Department official dang ten an tawiawm a. Er. Beizawzi T. Azyu, SE, I&WR Department chuan presentation a nei a ni.