3314/2022-2023

Pawlkut thla ni 20, 2023: Vawiin khan Lawngtlai District Level Monitoring Committee (DLMC) chu an Chairman, Lawngtlai Bawrhsap Pu Amol Srivastava hovin Lawngtlai DC Conference Hall-ah an ṭhu khawm a. "Centrally Sponsored Scheme - Formation and Promotion of 10,000 FPOs" hma lakna hnuaia Lawngtlai District chhunga RD Block pathum - Bungtlang 'S', Chawngte leh Sangau huam chhunga kut hna thawktute intel khawmna cooperative society chi khat, Farmer Producer Organisation (FPO) din chungchang an sawi ho.

He hunah hian district administration official leh state leh LADC-a line department ai awhte, NABARD leh Lead Bank ai awhte, NCDC leh CBBO ai awhte an tel a. National Cooperative Development Corporation (NCDC) ai awh hnen aṭangin Sawrkar Laipui Department of Agriculture & Farmers Welfare (DA&FW) hnuaia India rama FPO 10,000 din tura hma lakna kalpui mek chungchang leh a ruangam ngaihthlak a ni a. FPO-te tana sumdawnna kawnga kawng zawnsaktu tur, Cluster Based Business Organisation (CBBO) pahnih - Clover Organic Private Limited leh Angel Business Promoters of Mizoram te hnen aṭangin an hma lak tawhna leh Lawngtlai District chhunga hma lak dan tur an rawtnate presentation thlir ho a ni a. Clover Organic Pvt. Ltd hnuaia Lawngtlaia FPO din tawh, Kolodyne FPC Ltd aṭangin report ngaihthlak a ni bawk.

FPO hi kut hna thawktute'n hlawk zawka an thawh rah an seng theihna tura kawngkal nei taka an thawh ho va, an inzawm khawmna tur a ni a. He ruahmanna hnuaiah hian India hmarchhakah chuan FPO pakhatah member 100 aia tlem lo awmin, member-te hian chanvo (share) an nei vek dawn a. Kut hna thawktute thil thar chhuah hralh, thawn chhuah, vawn ṭhat leh a hlutna belhchhah tura thil dang siam nana hman (value addition) kawngah te CBBO-te'n a ṭul anga buaipuiin, kut hna thawktute'n hlawkna tam zawk an hmu thei dawn a ni.

Tun ṭumah hian Lawngtlai District chhung block pathumah FPO pakhat ṭheuh din tura ruahman niin, National Project Management Agency (NPMA) chuan Implementing Agency atan NCDC chu a thlang a. Anni hian Angel Business Promoters of Mizoram chu CBBO atan thlang ve lehin, kut hna thawktute dinhmun leh thlai chin tur zir chianna (baseline survey) an neih hnuah block tinah hian hma an la chho dawn a ni.

Lawngtlai District-ah he Scheme hi hlawhtling taka kalpui a nih theih nan DLMC chuan block tina hma lakna lo en zui turin Block Development Officer-te chu an block ṭheuhvah Nodal Officer atan a ruat a. Kut hna thawktute mamawh leh harsatna enpui a, a ṭul anga ṭanpui tur leh scheme awm sa nena inhne rem taka kalpui a nih theih dan ngaihtuah turin line department-te chu beisei leh ngen an ni bawk.

Attachment

  • Loading attachment...