3313/2022-2023

Kawrtethawveng, 20.01.2023: Chief Minister Pu Zoramthanga chuan vawiin khan RD Block 27-na atan Kawrtethawveng RD Block a hawng. Khuallian Chief Minister hian BDO Office (Forest Rest House luah hawh mek) hawnna leh Ngawngkawltlang a BDO office building thar sakna tur lungphum a phum a. RD Block lawmna inkhawm hi Kawrtethawveng Tennis Court-ah buatsaih niin, RD Minister Pu Lalruatkima chu khualzahawm a ni.

Chief Minister chuan Kawrtethawveng in RD Block an nei ta chu a lawmpui thu a sawi a. Kum 15 chhung zet RD Block neih theih nana beitu committee in sawrkara an lo nawr tawhna te hriatpuiin, theihtawpa an lo beih tawhna in rah a chhuah chu vawiin a mi te tan chauh ni lo, chhuan lo la awm leh zel tur atan hmasawnna thlentu a nih ngei a beisei thu a sawi a ni. Chief Minister chuan sawrkar inrelbawl naah chuan block level atanga development kal chhohpui chu hmasawnna thlentu pawimawh tak a nih dan leh, a pawimawhna an hriat chian avanga Kawrtethawveng BDO Office hmun tur pawh an thawh sup sup dan te leh, a thlawn hiala ram pek a ni chu ropui a ti a. Office sakna tur emaw, a kawng panna tur siamna emaw, mamawh dangte pawh bawhzui zel a nih tur thu a sawi. Chief Minister chuan heng hmalakna karah hian, a bik takin thangthar te zingah ruihtheihthil laka fihlim a pawimawhzia a sawi tel a. Zu leh ruihhlo chu kan ram hmelma, mihringte kan nih theih tur ni thei lo a min siamtu a nih avangin do tlat tur kan ni, a ti a. Ram tha tak, hausa taka kan siam theih hi tangkaia kan hman a, hmasawnna a thlen zel theihna tur chuan keini pawhin kan tih tur chinah theihtawp kan chhuah a tul ve a ni, a ti.

Minister Pu Lalruatkima chuan kum 15 chhung RD Block nei tura lo bei tawhin, demand committee te din a hma lo lak tawhna chu vawiinah Kawrtethawveng in a hmu ta chu lawmawm a tih thu a sawi a. RD Block a puan satliah chauh ni lovin, a fukekim a BDO leh a office turte nen tihfel vek a ni chu thil lawmawm tak a ni tiin, a hlawhtlinna tur atana kil hrang hrang atanga hma la a thawktute chungah lawmthu RD Minister chuan a sawi a. Sorkar inrelbawlna chu mipui tan a nih avangin hmasawnna rualkhai tak thlen zel tura hmalakna tam tak sawrkarin a neih mek zel thu tarlangin, Lunglei Municipal Council atan inthlang tura buatsaihna kal mek thu te a sawi bawk a ni.

Hachhek bialtu MLA Pu Lalrindika Ralte pawhin thu sawiin, vawiinah a bial chhunga RD block hawn a ni thei ta chu lawmthu sawiin, kum tam tak he ni hmuh theih nana lo bei tawh, mual liam ta te'n he ni an hmu ve thei lo chu a uipui thu leh, chutihrual chuan he ni hian hmasawnna duhawm tak a thlen belh zel a rin thu a sawi a. Mipui leh sawrkar chungah lawmthu a sawi a. Heng hmasawnna te hi hman atanga beisei, rual u ten suangtuahna an lo neih hmasak vang a ni tiin an chungah lawmthu a sawi bawk a ni.

RD Block hawnna inkhawmah hian SYS Minister Pu Robert Romawia Royte, Manpower Development Board Vice-Chairman Pu Zothantluanga, Commerce & Industrial Development Board Vice Chairman Pu K. Laldawngliana, Youth Affairs and Tourism Board Vice-Chairman Pu T.C. Pachhunga, Ex-MLA te an tel a. Mamit District hotute leh District huam chhunga RD thawktute an tel bawk.

Inkhawm hi Commissioner & Secretary, Rural Development Department Pu R. Zarzosanga chuan kaihruaiin, Director Pu R. Lalthazuala chuan report a pe a. Mamit DC Pu Lalnunhlua chuan lawmthu sawiin hun a khar a ni.

Kawrtethawveng RD Block thar hi May ni 20, 2022 khan Zawlnuam RD Block atanga then hran niin khaw 21 leh Sub-village 1 (New Kawnpui) a awm a. (Heti hian Zawlnuam RD Block ah hian khaw 35 a la awm a ni).

Kawrtethawveng RD Block thar vil tur hian heng post - i.e. BDO-1, Assistant -1, Inspector of Statistics-1, UDC-1, LDC-1 te chu dt. 7.10.2022 khan Sawrkarin a siam thar a, Block thar pahnih - Kawrtethawveng leh Tlabung RD Block te enkawl zuina turin Rs 66.42 lakhs chu Finance Department in ni 1.11.2022 khan a allocate bawk a ni.

Tunah Block Office bul tan tur hian MGNREGA atangin staff 10 (sawm) leh RD Department atangin Clerk 2 (pahnih) dah nghal a ni a, BDO tur pawh hi sawrkarin a ngaihtuah mek bawk a ni.

Kawrtethawveng RD Block hnuaia khua awmte chu hengte hi an ni:

1) Tuidam
2) Tuipuibari I
3) Tumpang Lui
4) Khantlang
5) Kawrtethawveng
6) Nalzawl
7) New Nalzawl
8) New Eden
9) North Bunghmun
10) Bawngva
11) Belkhai
12) Andermanik
13) Darlak
14) Rajiv Nagar I
15) Rajiv Nagar II
16) Zomuantlang
17) Mualthuam
18) Thaidawr
19) Sotapa
20) Phuldungsei (Zampui)
21) Tuipuibari Venghlui