No.4747/2020-2021

Kolasib 4th August, 2020 : Vawiin chhun khan Kolasib district Bawrhsap Dr H Lalthlangliana hovin District Level Committee on African Swine Fever & other transboundary Animal Diseases (TADs) chuan thutkhawmna neiin, African Swine Fever leh ran natna ramri kaltlanga inkaidarh theih hrang hrangte ven dan tur an sawiho.

Dr H Lalthlangliana chuan ram dang leh State dang atanga Vawk, vawksa leh vawksa atanga siam reng reng Kolasib district-a lakluh khapna thupek dinglai awm chu check gate-ahte khauh tak a kenkawh chhunzawm a nih tur thu a sawi a, African Swine Fever chungchanga mipuite hraittur pawimawhte chu a zau thei ang ber a inzirtirna kalpui a tul thu a sawi bawk a ni.

Dr.Engkunga Chhangte, DVO & Member Secretary, District Level Coordination Committee on African Swine Fever chuan African Swine Fever awmzia sawifiahin AH &Vety Department hmalakna leh hmachhawpte a tarlang a. African Swine Fever chu Vawk leh Sanghalte vei theih, a vei tawhte thihpui thin a ni, a ti a. Kum 1921 ah Kenya ram a hmuh chhuah a ni a, 2018 ah China a hmuhchhuah a nih thu leh Myanmar Shan State-ah nikum 2019 ah hmuhchhuah a ni, DVO chuan a ti a. Mizoramah engtik lai pawha lo lut ve thei reng a nih thu sawiin, Covid-19 vanga ramri ven a nih avangin kan la him hram a, ramri hi uluk tak a ven chhunzawm a nih loh chuan ramri kaltlangin Vawk lakluh atanga lo lut thei reng a nih thu a sawi. India hmarchhak state a ASF lo luh dan tlangpui sawi langin, 2020 January-ah Arunachal Pradesh, May-ah Assam leh August-ah Meghalaya-ah te lo lutin vawk singhnih chuangin an thih phah thu a sawi. Kolasib district-ah hian vawk 23,469 awm mek ang a chhut a ni a, hei hi Mizoram pum a vawk awm zat, za zelah 8.8 ang vel a ni.

Meeting-ah hian African Swine Fever chungchang inzirtirna neih dan tur Work Plan duan chu pawm a ni a. African Swine Fever hlauhawmna leh invenna kalpui dan tur inzirtirna chu Kolasib district chhung, ramri dep a khaw 8-ah kalpui tur a ruahman a ni.