Lo neitu chhungkaw 35 te enkawl Leipan Zau leh
Tawngbawk Zau, Sialsuk-ah nimin khan Agriculture Minister Pu KS
Thanga hovin Lo Zawh ani.
Kut hnathawktu te tan chuan Lo Zawh Ni hi ni
pawimawh tak, ni hlimawm a nih thu khuallian Pu KS Thanga chuan sawiin
ama tan tak pawh Agriculture Minister anih pumhlum kum khatna a lo
nih zui ve lehzel avanga lawmawm a tih thu a sawi a. Lo vah lai atanga
kan chaw ei dawhkan lo thleng tura buh chin dan indawt -
step hautak zia leh hlawhtlin hnua a hlimawm dante sawifiahin, Ei leh
bar hi khawvel ram changkang te chuan an ngai pawimawh a. Buh
leh thlai te hi kan siam theih anih loh avangin kan zah tur a ni a,
paih mai mai tur ani lo tiin inrenchem te hi kawm vang a ni lova, hisap
taka in relbawl te hi zirin tih thanah neih a tul thu a sawi.
Mihring te hi leilung nena inkungkaih tura
Pathian duan kan niin leilung atangin ei leh bar leilung atanga
haichhuah a ngai ani, lo neih dan te thiam chho zelin, kum tin hmun thar
zuan lovin, kum engemaw zah atana hmun nghet neih a hun tawh thu
leh thawhrimna atang hian hlimna leh lawmna pawh a awm tiin Agriculture
Minister chuan Buh leh thlaia Raltiang ram kaia malsawmna dawng ngei
turin loneitu te chu duhsakna a hlan a ni.
Pi Zothansangi, Joint Director pawhin thu sawiin hetiang
programme hi Agriculture Department pawhin an hman ngai zen zen loh anih avanga
lawmawm a tih thu sawiin leilet atang ringawt chuan ei leh barah a in daih
theih loh avangin tlang ram lo neih hmanga ei hmuh a ngaih dante sawifiah in
buh tam tak thar chhuak ngei turin duhsakna a hlan bawk a ni.
Pu R Lalnunzira, District Agriculture Officer
kaihhruai lo zawh ni hian Zau neitute aiawhin Pu Malsawma’n thu a
sawi bawk a, lo neitu te bakah Agriculture Departmenta Officer
leh thawktu ten hman puiin zaithiamte zai a intihhlimna te
neiin Lo zawh ruai te kilho ani.
Leipan/Tawngbawk Zau hi 15 Ha vela zau niin Buh tin 38.5 vel tuh ani a. Rs.1,02,200 vel thlai thar atanga sum hmuh tawh a chhut a ni a, buh chi hrang Maite,Mang buh leh chi dang dangte chin an ni bawk.
