Nimin khan Extension Education Institute for N.E. Region (EEI), Jorhat leh State Agricultural Mangement & Extension Training Institute (SAMETI), Mizoram tangkawp te buatsaih ni li awh training chu Pu R.K. Nithanga, Director, SAMETI in Agriculture Committee room ah a hawng.

Hawnna thu sawiin Pu R.K. Nithanga chuan thiamna leh finna thar te hi a thu a hriat mai a tawk lova, zei leh remhre taka a taka thawh dan thiam tel a ngai a, chumi atan chuan Skill Development hi a pawimawh hle a ni. A thu a thiam, a taka thawk thiam lo kan tam viau chuan kan hna in a tuar thei a, a thu a sawi thiam lem lo pawn a taka an thiam bel hle chuan a tangkai zawk a ni a ti. Sorkar laipui chuan skill development hi a ngai pawimawh hle a, kum 2013 atangin Ministry of Skill Development & Entrepreneurship a din a, chu chuan National Skill Council of India (NSCI) te, Agriculture Skill Council of India (ASCI) a hring a. ASCI chuan SAMETI, Mizoram chu Provisional affiliation pe in 2017-18 chhungin Training pahnih, Tractor Operator leh Sericulturist pe turin a thlang ve nghe nghe a ni a ti.

Training thupui hi “Designing and Management of Skill Development Training Programme” tih a ni a, zirtirna pe turin EEI, Jorhat atangin Dr. S. Barua, Asst. Professor leh Mr. H. Das, Research Associate te an lo kal a ni.

He training ah hian Department hrang hrang Agriculture, A.H. & Vety, Fisheries, Sericulture, Land Resources, Soil & Water Conservation Dept., KVK leh District hrang hrang a ATMA a thawk te an tel a ni.