India ram pum huapa in tinin electric connection an neih theihna tura sawrkar laipui Ministry of Power hmalakna pawimawh tak Pradhan Mantri Sahaj Bijli Har Ghar Yojana (SAUBHAGYA) chu vawiin khan P&E Department, Lunglei District buatsaihin DC Conference Hall-ah Pu K. Lalrohlua, Project Director, DRDA in a hawng. He scheme hi Prime Minister Narendra Modi chuan kum kalta September 25 khan a lo hawng tawh a, a tum ber chu khawpui leh thingtlang khua zawng zawnga eng pek leh December 2018 ral hma ngeia hmaih awm lova in tina eng (electric connection) lak luh a ni.

Vawiin SAUBHAGYA hawnna programme Pu Benjamin Lalzama, Lunglei Additional DC kaihhruaiah hian Pu K. Lalrohlua chuan thu sawiin mipuite tana scheme pawimawh tak leh tangkai tak tur Lunglei District-a kalpui a ni tur chu lawmawm a ti a. Hemi kawnga chak taka hmalatu P&E Department hnathawkte chu fakawm tiin he scheme-in a thil tum ti hlawhtling tur chuan mipuiten Sawrkar hmalakna theihtawpa an tawiawm a tul a ni, a ti. Pu K. Lalrohlua chuan sawrkar hmalakna hrang hrang kalphung leh thil tum te mipuiten an ngaihven a, an inzir ve a tul a ni tiin tluang taka he scheme hi kalpui a nih theih nan P&E Department thawktute chungah duhsakna a hlan nghal bawk.

Er H. Zoliana, Superintending Engineer (P&E) Lunglei Power Circle pawhin thu sawiin SAUBHAGYA scheme sawi zauna hun a hmang a, Pu Zodingliana, Executive engineer, Power Maintenance Division –I, Lunglei in lawmthu sawiin hun a khar.

Pradhan Mantri Sahaj Bijli Har Ghar Yojana (SAUBHAGYA) scheme hi chak taka kalpui turin ruahmanna siam mek a ni a, Lunglei District huamchhunga in tinin electric connection an neih theih nan thingtlang khaw hrang hrang ah camp neiin P&E Department hnathawkten an kal chilh dawn a ni