Vawiin chawhma dar 11:00 khan Saikuti Hall ground floor Lunglei-ah Parliamentary Secretary Pu K.S Thanga’n ni 18 - ni 19 January, 2012 a neih tur Exhibition a hawng. He hun ah hian ATMA hnuaia Department te Agriculture, Horticultur, Fishery, AH&Vety, Soil & Water conservation leh Sericulture Department hnuaia kut hnathawktute leh Department te hmalakna a thil thar chhuah leh khawl te pholan a ni.

Parliamentary Secretary chuan sawrkar hmalakna leh kut hnathawktute thawh rah pholan a a awm thei chu a chhuanawm thu a sawi a, ram in ei leh bar a intodelhna kawng a ke a pen chak theih nan sawrkar mithiam te thiamna hman a nih pumhlum theih nan sawrkar in a mithiam te thlun na a suih dul mek a ni a ti.Mizoram hian Buh leh thlai thlak nan duhthu samin hmunawl a nei zauva hma pawh a thui in sawrkar mithiam te leh ram mipui zinga 70% hi kut hnathawktu te inrintawnna a ni a, rual tak a ke an pen a tul thu a sawi bawk.Hnathawktute kut chhuak pholan hi thil tul tak phurna, beiseina leh hlawhtlinna thlentu ani a ti. Sawrkar in rim tak a thawk, intungnung zolo te hi a lainat an a duhsak in VIP ah a dah thu a sawi a, hriselna nei tha te thatchhiat avanga harsa te erawh VIP ah an dah ngailo ani a ti. Agriculture thil tum lian ber chu buh thar tam a ni a, sawrkar leh loneitute hma lakna in kum liam ta a buh thar chu 10% in a pun thu a sawi bawk. Buh thar tam kum hi kan hmang liam lova bul kan tan mai chauh a ni a ti. Sawrkar hian loneitu te hmakhua a ngaiin hmundang tih theih loh 75% subsidy in khawl 600 chuang a sem tawh a, kumin chhunga 200 sem a nih leh tur thu a sawi bawk a ni. He achievement hi kum 25 chhunga khawl sem tawh aiin a tam a ni a ti. Loneitute pawn Mizo rilru a lian mithiam leh khawl thar a in nghah mai harsatna hi kan hnawl a hun tawh a ni a ti.

Parliamentary Secretary chuan sawrkar in theih tawp tak meuh a chhuah a, loneitu leh kut hnathawktute pawhin sawrkar laka an bat ve chu sawrkar in ei leh bar a intodelh nan a ruahman na a siam te rinawm leh taima taka thlawp tlat anih thu a sawi.

Vawiin Exhibition hawnna Programme hi DAO, Lunglei Pu R.Lalnunzira’n kaihruaiin kut hnathawk tu tha hnem tak an tel a, Exhibition ah hian thlaithar te, ran vulh te, silk pangang, thlai chi, khawl, pangpar, thei leh thingkung te chi (bonsai) leh thil dang tam tak pholan ani a, exhibition a tel ti tha deuh te hnen ah hian lawmman hlan tum a ni.