1276/2024-2025

Aizawl, the 23rd July, 2024: Agriculture and Farmers Welfare Department chuan vawiin khan Agriculture Conference Hall, Directorate of Agriculture-ah leilet neitute buhhum thar chhuah leisak kawnga hmalakna 'Paddy Procurement Programme' chungchanga pawimawhte inhrilhhriatna hun 'Sensitization Programme on Implementation of Paddy Procurement' a buatsaih a, he hun hi Agriculture and Farmers Welfare Minister Pu PC Vanlalruata chuan khuallian niin a hmanpui a ni.

Khuallian Pu PC Vanlalruata chuan loneitute atanga buhhum leisak dan tur Paddy Procurement Programme chungchanga pawimawhte inhrilhhriatna leh inrawnkhawmna hun buatsaih a ni chu lawmawm a tih thu a sawi a. Mizoram Sawrkarin tunhnaiah Chief Minister kaihhruai 'The Mizoram State Government Paddy and Rice Procurement Committee' a din tih sawiin, hemi hnuaia din Task Force-in loneitu atangin buhhum leh buhfai leisak theih a ni em tih a zirchiang dawn a, vawiina hun hman pawh hi hemi kaihhnawih hmalakna pawimawh tak a ni, a ti a. Sawrkarin support price siamin thlai pali lei tura ruahmanna a kalpui thu sawiin, hemi bakah hian buhhum lei turin zirchianna kalpui mek a nih thu a sawi a. Khawvel changkang leh hmasawn zel mila insiamrem thiam a tul thu sawiin, khawl hmanga hnathawh farm mechanisation kan kalpui uar deuh deuh a ngai a, Sawrkar pawhin hemi kawngah hian mamawh dan a zirin ruahmanna a siam zel dawn a ni, a ti bawk.

Agriculture and Farmers Welfare Minister chuan Mizoramah buh leh thlai chinna tur hmunhma tha tak tak vawiin thlenga la hman tangkai loh engemawzat a awm thu sawiin, tuna kan hman tangkai mek bakah hengte hi kan cheibawla kan hman tangkai phawt chuan kan eikhawp mai bakah thawn chhuah tur thlengin kan thar thei dawn a ni, a ti a. State pawn atanga buh leh thlai la lut reng lova mahni thar chhuah hmanga  intodelh tuma hmalak a pawimawh thu sawiin, mahni kutkea ding thei turin agriculture sector bikah ram leh hnam hmangaihna thinlung agricultural nationalism pu chunga tanlak a tul thu a sawi a. Pathianin ram leilung tha tak min pek hi intodelh nan hman tum ila, hei hi kan hnam zahawmna leh ropuina tur a ni, a ti a. Paddy procurement programme kalpui tura inpuahchahna kalpui chhoh mekah a hlawhtlinna hmuh a nih theih nan kan zavaia tanrual a pawimawh hle dawn a ni, a ti bawk. 

He programme hi Pi Ramdinliani, IAS, Special Secretary, Agriculture and Farmers Welfare Department chuan kaihruaiin Dr. Samuel Lalliansanga, Dy. Director (Planning) in PowerPoint Presentation hmangin paddy procurement programme kalpui kawnga hriattur pawimawh leh tunhnaia Tripura State tlawha zirchianna an neihte bakah Kolasib leh Mamit District-a Wet Rice Cultivation (WRC) area neih dan survey report a sawifiah a. Pu Tlangtimawia Zote, Jt. Director & Convener, Team II (Mamit District) leh Pu George Lalthanngura, Jt. Director & Convener, Team III (Kolasib District) te'n team hmalak dan tlangpui an sawifiah a. WRC neitu aiawhin Pu Benjamin, IDAS (Rtd.) leh Pu ZR Thahmingliana te'n thu an sawi a. Hemi hnu hian Pu Vanlalthlamuana, Director, Agriculture and Farmers Welfare Department kaihhruaiin sawihona leh inrawnkhawmna hun hman a ni a. Pu R. Lalnunzira, Addl. Director, Agriculture and Farmers Welfare Department-in lawmthu sawiin hun hman a khar a ni.   

He hun hi Aizawl tlang atanga Kolasib leh Mamit District chhunga leilet neitute tana tih bik a nih rualin Kolasib leh Mamit District chhung khaw hrang hranga sensitization programme lo kalpui tawh khaikhawmna a ni nghal bawk a. Leilet neitute chu buh ching uar tur leh hralh chhuah tham nei tura tan la tura chah niin, ram leilung fate ngeiin a hlawkna an tel ngei theih nana hmalak a tulzia hrilhhriat an ni a. Loneitute atanga buhhum lei (paddy procurement programme) leh Public Distribution System (PDS) nena thlunzawm turin Minimum Support Price (MSP) siam a tul bakah loneitute leh Line Department-te nena tanrual tlan a pawimawh thu tarlan a ni a. Kan ram leilet ngeia buh tharte leina tura ruahhmanna leh hmalaknate leilet neitute hi hrilhhriat niin, sawihona hun hlawkthlak tak hman a ni a, leilet neitute'n an hlutin chhimtu pawh an thahnem hle a ni. 

Agriculture and Farmers Welfare Department chuan Kolasib leh Mamit District-ah kumina leilet buh chinna hmun hactare 1280 a zau survey a neih atangin buhhum quintal 27194 thar chhuak turin a beisei a. District pahnihah hian buh chinna leilet zau (WRC cluster) 121 awmin leilet neitu 2252 lai awma chhut a ni a. Kum 2017-2018 ah khan Agriculture and Farmers Welfare Department chuan Special Programme for Establishment of Mini-Rice Mill chu State danga buh hralh a nih loh nan leh leilet neitute hamthatna turin a lo kalpui tawh a. Paddy Procurement Programme hlawhtlinna tur hian kumin July thla tir khan Mamit leh Kolasib District khaw hrang hrangahte Paddy Procurement Sensitization Drive kalpui niin Department hotute kaihhruaina hnuaiah Officer thahnem takin sawrkarin buh tharchhuah man man zawka a lei tur chungchang inhrilhhriatna leh sawihona hun hman a lo ni tawh bawk a. Heng bakah hian Agriculture and Farmers Welfare Department atangin Jt. Director leh Dy. Director-te chuan Paddy Procurement Programme lo hlawhtlinpui tawh state Tripura tlawhin State Department hrang hranga hotute kawmin an buh lei dan system zirchiannate an nei a, paddy procurement centre leh rice mill-te tlawhin zirchianna hun hlawkthlak tak an hmang a ni.