1277/2024-2025

Siaha the 23rd July 2024: Safai Apnao Bhimari Bhagao (SABB) chungchangah vawiin khan UD&PA hnuaia DAY-NULM District Project Officer (DPO) Pu Vanlalchhuanliana, Siaha SDO (Sadar) ni bawk kaihhruaiin a office chamber-ah meeting neih a ni a, sawrkar official hrang hrangte bakah NGO aiawhte an kalkhawm.

Vawiin thutkhawmah hian DPO Pu Vanlalchhuanliana chuan SABB chu Swachh Bharat Mission (U) hnuaia sawrkar laipui ruahmanna a nih thu sawiin ruahsurin chhiatna a thlen theih laka lo inven dan (monsoon preparedness) chungchang a ni a ti a. Mizoram-ah SABB campaign hun chhung chu July ni 15 atanga August ni 31 thleng a nih thu tarlangin ruahsur nasa in chhiatna a thlen theih laka lo inven te, ruahsur in a ken tel theih hri tha lo laka inven bakah faina chungchangah mipui kan than harh lehzual theih nana duan a ni, a ti.

Pu Vanlalchhuanliana chuan Department hotute bakah NGO te tan hona a pawimawh hle a a hriat thu a sawi a, mipui zirtirna kawngah theihtawp chhuahpui turin a sawm. SABB campaign chu ‘Stop Diarrhoea Campaign’ nena kal kawp tlat a nih avangin Medical lam pawh theihtawp chhuahpui turin a sawm bawk.

Vawiin meeting chuan Garbage Vulnerable Points a hnawm hnawk thenfai dan tur te, wet waste leh dry waste thenfai dan te, vantlang inthiarna fai taka enkawl a nih theih nan te leh water quality sampling neih thin dan tur te an rel a, fainaah tun aia nasa a hma kan sawn theih nan theihtawp chhuah tul a tih thu te sawiin khawpui fai inelna ah kum hmasa lam aiin nasa lehzuala thawk a, lawmman dawn ngawr ngawr ai chuan Siaha khawpui a lo fai zawk nan leh khawpui nuam leh changkang a lo nih theih nan ngaituahna sen ho a ni. Concerned Department te nen tangkawpin faina inzirtirna (cleanliness awareness drive) nasa lehzualin neih ni se a ti bawk. DPO Pu Vanlalchhuanliana chuan a bikin khawtlang hruaitute chu thawhho puiah a sawm a, rawtna nei te tan sawi hreh lo turin leh khawtlang tan theihtawp chhuah pui turin a sawm nghal bawk a ni.