Nimin tlai atanga a bial fang kuala zin mek Lunglei West Assembly Constituency bialtu MLA leh Agriculture, Cooperation leh Irrigation and Water Resources Department-te changtu Minister ni bawk Pu C. Lalrinsanga chuan vawiin khan Hauruang, Sazaikawn, Vanhne, Thuampui, Rahsiveng leh Venghlun te a tlawh. Heng khua leh veng ah te hian khawtlang hmasawnna tura hnathawh tul hrang hrang a hmunah enfiahin sawrkar official-te leh khawtlang hruaitute hmalak dan tur a sawipui.

Tukin zing karah Hauruang tlawhin K. Lalmuanawmi Memorial English School ah zirtirtu leh zirlai naipangte nen hun an hmang a. Minister chuan Sawrkar school-te tan an lak thar a tul takzet thu a tarlang a. Development kawng hrang hrangah hmasawnna ruhrel hrang hrang (infrastructure development) a pawimawh em em rualin mihring hmasawnna (Human Resource Development) hi a pawimawh hmasa ber a ni, a ti a. “Kawng ṭha, building ṭha leh thil dang chu engzat pawh nei ila, a enkawltu mihringte chanchin zawk hi a  pawimawh ber zawk zel. Chu Human resource development hna bulthum leh pawimawh ber mai chu zirtirtute kutah hian a innghat a. Tunlai khawvelah Zirtirtuten min chher ang hi kan nih zui dan a ni fo. Ram hmasawnna ah hian Minister leh zirtirtu mawh hi a dang chuang lo. I ṭang hle teh ang u" tiin Hauruang Zirtirtute  a fuih a ni.

Tin, MZU Southern Campus awm tur chu Mizoram, a bik takin chhimlam District-te tan malsawmna ropui tak a ni tiin hemi kawnga chak taka hma la tu sawrkar hotute chungah lawmthu a sawi a ni. 

Cooperation Minister hian a bial chhung khua a tlawh kim ang a, naktuk Feb Ni 5, 2020 hian MAHCO buatsaih Lunglei Special  Handloom Expo chu Lunglei Convention Centre ah a hawng ang.

Attachment

  • Loading attachment...