International Paragliding Accuracy Championship 2020 February ni 12 leh 16 inkara Serchhip a neih turah Chinese tel tur te lo thleng tawh tih leh heng mite hian Corona virus an vei a, Serchhip Civil Hopital ah finfiah an ni tih Social media platform hrang hranga lo lang leh darh mek hi thu diklo hulhual a ni tih International Paragliding Accuracy Championship 2020 Organizing Committee chuan a sawi.

He thil thleng hi Organizing Committee chuan pawi tiin heng thuthang diklo hi mipui ti chiai thei leh he Championship hming ti hliau thei nia an ngaih bakah ram pahnih inlaichinna thleng pawha thil pawi thei anih avangin thu dik lo thehdarhtu te zawnchhuah an nih theih nan nimin khan Vaivakawn Police Station ah FIR thehluh a ni.

Serchhip Civil Hospital, Medical Superintendent pawhin hetiang case hi Serchhip leh a chheh velah an awm loh thu leh Chinese mikhual lo thleng pawh an awm loh thu a sawi a, mipui te hetiang thuthang diklo hi awih lo tur leh thehdarh lo turin a ngen nghal bawk a ni.

IPAC 2020 hi karleh 12-16 February khian neih a ni dawn a. Heta tan hian inpuahchahna tluang takin a kal zel a, mipui a duh apiang he Championship ropui tak en tur hian sawm kan ni a. A duh tan pawisa chawiin Paragliding – Joyride a tih theih dawn nghe nghe a ni.