Vawiin khan Mizoram sawrkar Health and Family Welfare Department bultumin World Cancer Day chu Health Minister Dr R.Lalthangliana hovin Assembly Annexe Conference Hall, Aizawlah an hmang.

Dr R.Lalthangliana chuan cheng vaibelchhe 500 zet senna tur Zemabawka Cancer Speciality hospital sakna tur JICA te nen ruahmanna an siam fel tawh tih sawiin, “rang takin bul kan tan thei dawn”, a ti a. He hospital sak tura ruahman hi hmar chhak State te zinga cancer enkawlna hospital tha ber a nih a beiseiawm tih a sawi. Damlo enkawlna kawngah thiamna, hmanrua leh khawl tha te a pawimawh em em rualin thawktute inpekna a pawimawh lehzual, Minister chuan a ti a. Doctor te leh nurse ten damlo te an dawr dan a pawimawh a, an tawngkam leh thlamuanna aw ka in damlo na tak tuar te nasa takin a chhawk thei a ni, a ti.

Cancer hi kum tin khawvel pumah mi maktaduai 9 leh nuai 6 vel thihna thlen tu a ni a. Khawvela thihna thleng zawng zawng chawh ruala hmun ruka thena hmun khat hi cancer natna vang a ni. Ram changkang te aiin ram changkang lo zawk (low and middle income countries)-ah cancer avanga thihna a thleng tam zawk a, cancer vanga thi za zela sawmsarih te hi heng ram changkanglo zawka thleng a ni. Cancer thlentu hi thil chi hrang hrang a awm rualin a thlentu tam ber chu vaihlo niin cancer natna za zela sawmthum hi vaihlo zuk leh hmuam vang a ni. Mizoramah hian kum thum chhungin mi 2176 cancer vangin an thi a. Chawhrualin kum khatah cancer vangin mi 725 thi thin ang a ni.

Khawvela mihringte thihna thlentu natna zingah lung natna dawtah cancer hi a sang ber a. He natna laka inven dan, enkawl dan tur leh hmuhchhuah hma kawngah inzirtirna beihpuithlak nan Union for International Cancer Control (UICC) bultumin khawvel pumah World Cancer Day hi hman thin a ni a. Mizoramah pawh kum 2014 atang khan he ni hi kum tin hman thin a ni. Thupui hi kum thum atan thlan thin a ni a, kum 2019 atanga 2021 thlenga an thupui thlan chu “I am and I will” tih a ni.

Programme hi National Health Mission (NHM) Mission Director Dr. Eric Zomawia’n a kaihruai a. Cancer management chungchang Dr Jeremy L Pautu, National Programme for Prevention and Control of Cancer (NPCDCS) State Nodal Officer chuan a sawi a. Mizoram State Cancer Institute a Radiation Oncology Head of Department ni lai Dr B.Zothankima pawhin World Cancer Day thupui sawi zauna hun a hmang bawk a ni.