Chief Minister Pu Zoramthanga chuan vawiin khan Mimbung ah Sialkal Range Development Council Office thar, Rs. 45 lakhs a sak chu a hawng. Sialkal Range Development Council hian Lengteng Ieh Champhai North Assembly Constituency a khaw paruk - Mimbung, Hrianghmun, Teikhang, Kawlbem, Selam leh Vaikhawtlang te huamin February ni 24, 2012 khan development board a din a ni a. Council (SRDC) ah September ni 24, 2013 khan thlak a ni.

SRDC office hawn lawmna inkhawmah hian Chief Minister chuan Sialkal Range Development Council office hawn a ni chu lawmawm a tih thu sawiin, a building sak pawh a pawisa hman nen inmil a tha nia a hriat thu a sawi a. Nakin zelah pawh council area chhunga hnathawh tur dang hrang hrang la awmte chu pawisa milin a that zui zel pawh beiseiawm a tih thu sawiin, chutianga thawk zel tur pawhin kalkhawmte a chah a ni. Chief Minister chuan Sialkal tlangdung khua tihhmasawnna tura thahnemngai taka hma lo latu tawh zawng zawng chungah lawmthu a sawi a. Hamlak zelna tura pawh thawhhona tha neih a pawimawh thu a sawi a.

Chief Minister chuan SRDC chu council puitling a hlan a nih theih nan thawihtawpa sawrkarin hma a lak pui tur thu a sawi a. Buh a intodelh theih nan a leilet siamna tura hmalakpui tura an thlen pawh project siam tura chah in, sawrkarin lo bawhzuiin hma a lo lakpui zui tur thu a sawi a. Manipur nen a inkalpawhna tur lei dawh tha zawk siama hmalak a nih tur thu te a sawi bawk a. Chief Minister chuan Higher Secondary School te a tha tawklo tih sawrkarin hriatpuiin, kumtharah chuan theihtawpin puih dan a ngaihtuah tur thu te, khualzin te tana thlenhmun tha a awm theih tura hmalak te, inkalpawhna kawng tha zawk siam turin SRDC area ah chuan theihtawpa hmalak a nih tur thu sawi bawkin, SEDP kaltlanga thing theirah chi leh a dang te tihhmasawn tura hmalak tum a nih thu a sawi bawk. Heng hmalak zawng zawngah hian mahni khua theuh tan leh Mizoram pum tan mipuiten an zavaia thawhhona tha an neih a, mahni zawn theuhah theihtawp chhuah a tul thu a sawi a ni.

SRDC member, Champhai North bialtu MLA Dr. ZR Thiamsanga chuan vantlang inkhawm hi kaihruaiin, Sialkal tlangdung khua te midang ruala hmasawnna ke an pen ve theihna tura SRDC hmasawnna tura sawrkarin hma a lakna chu lawmawm a ti a. A tiphuisui tur office hawn a ni thei chu lawmawm ti bawkin, council din a nih chhan ang ngeiin Sialkal tlangdung khua ten hmasawnna nasa tak an neih phah ngei a rin thu a sawi a. Dr. ZR Thiamsanga chuan agriculture leh horticulture lamah phei chuan helai tlangdung khua te hian hmasawn theihna tam tak neiin, Mizoram economy tan pawh tangkaina tam tak la nei chho tur an nih thu a sawi a ni.

Council Chairman Pu L. Thangmawia, Lengteng MLA chuan SRDC chu Sialkal tlangdung a chengte tihhmasawn na tur a nih angin eirukna tello in rinawmna leh thawhrimna nena kalpui a nih tur thu a sawi a. Health development lamah te leh zirna lamah te, a bik takin manpower development lamah hmala tura ruahmanna siam a nih thu sawiin, mi thiam leh hmantlak tam tak an chhuah phah ngei a rin thu a sawi. SRDC Council Chairman chuan SRDC fund chu sum siamna remchang atana hman chi a nih loh thu leh hmalakna te chu party emaw zarzo tuma tangkai pui tum chu a nih loh thu sawiin, a phu leh awm a te chu mi taima te an nih thu a sawi. SRDC tana ministry hmasa a bul lo tantu te leh hma la tute zawng zawng chungah lawmthu a sawi bawk.

SRDC office hawnna inkhawm hi thuang hnih a neih niin, office hawnna hun neih hmasak niin, a lawmna pui vantlang inkhawmna buatsaih leh a ni a. "Profile & Achievement of Sialkal Range Development Council" lehkhabu chu Chief Minister hian a tlangzarh nghal a ni.

He inkhawmah hian Saitual, Khawzawl, Champhai leh Aizawl atangin official engemawzat leh Manipur atang te in an kal a. Mimbung VCP Pu Dampau Guite, Zomi Council Gen. Hqrs Speaker Dr. R. Sanga leh midangte atangin thusawi ngaihthlak ni bawkin, Ngopa BDO Pi Lalhruaitluangi hnen atangin SRDC din a nih chhoh dan leh hmalakna lo awm tawh tlangpui report ngaihthlak a ni a. Pu Vanlaltanpuia, Ngopa SDO(C) chuan lawmthu sawiin hun a khar a ni.

SRDC hi kum 2012 a din tan a nih khan kumtin Rs. 50 lakhs hmuh thin chu SRDC huam chhungah hna hrang hrang - Retaining Wall, Slab culvert, PCC Pavement, Stone Masonry Step, Building, kawng laih leh adang te sak nan hman thin a ni a. Kum 2019-20 atang khan budget tipungin Rs.200 lakh dah a ni. Kum 2017-2018 khan kum danga fund hmuh thin bakah NEDP Special Package atangin Rs. 50 lakh dang dawn belh a ni a. Chumi atang chuan thildang bakah vawiin a hawn tak SRDC Headquarter office, Mimbung hi sak a ni a. NEDP Special package atanga Rs. 35 lakhs bakah normal fund atanga Rs. 10 lakhs hmangin office hi sak zawh a ni a. Council office building sakna ram zau zawng hi 3250 sqm a ni a. RCC structure niin chhawng thum a sak a ni a. Chairman leh Vice Chairman office bakah Conference room, establishment room, staff room leh garage te a awm a ni.

Tun dinhmunah SRDC Chairman leh member te chu hengte hi an ni:

Chairman: Pu L. Thangmawi, MLA
Vice Chairman: Pu Ginlianthang, VCP, Vaikhawtlang
Member Secretary: Pu Vanlaltanpuia, SDO, Ngopa

Members :

Dr. ZR Thiamsanga,MLA
Pu Dampau Guite, VCP Mimbung
Pu Lamzathang, VCP Teikhang
Pu Thangdokap, VCP Hrianghmun
Pu G. Kaizamuan, VCP Kawlbem
Pu Thangngaihliana, VCP Selam

Aizawl ah SRDC Cell Office siam ni bawkin nikum May ni 28 khan Venghluiah Chief Minister in a lo hawng tawh a ni.

Attachment

  • Loading attachment...