Vawiin chawhma khan DC Conference Hall, Kolasibah District Consultative Committee (DCC), District Level Review Committee (DLRC) & District Level Security Committee (DLSC) chu Pi Sangchhin Chinzah, Deputy Commissioner kaihhruaina hnuaiah neih a ni.

He meeting ah hian Chairman Pi Sangchhin Chinzah, Deputy Commissioner chuan thusawiin Bankers leh line Department kalkhawmte chu mipuite rawngbawl an nih hre reng turin a chah a, mipui nen a awlsam zawka indawr tawnna neih a nih theih nan vawiin thutkhawm chu harsatna hrang hrang awm te chinfelna hun tangkai a hmang turin a fuih bawk a ni.

He Meeting-ah hian Pu Asim Joyti, Lead District Manager, Lead Bank Office Kolasib chuan kalkhawmte lawmna thu a sawi a, Pi Zinia Baruah, Manager, RBI Aizawl leh Pu JD Traite, District Development Manager NABARD Kolasib te chuan vawiin thurel hrang hrang chhawpchhuah te sawi zauna leh hmalak tawhna te tarlanna hun an hmang bawk a ni. Meeting-ah hian NABARD te buatsaih Potential Linked Credit Plans (PLPs) 2020-21 for Kolasib district lehkhabu chu bawrhsap hian a tlangzarh a, PLPs 2020-21 chhung hian Kolasiba bank te chuan hmalakna hlawm hrang hrangah Cheng Nuai 11048.78 semchhuak tur a ruahman an ni.

Vawiin thutkhawm ah hian thurel 18 neih a ni a, Kolasib district chhung a bank hrang hrangte hnathawh leh harsatna te ngun tak a sawi ho niin tha zawka hna kalpui a nih theih dan turte rel a ni bawk. Thutkhawmnaah hian thlai leh lo siamtute hnena sum puk tir bakah ran vulh tanpuina lam a loan pekchhuah chu mipuiin an chhawr tangkaiin hle ni a hriat a nih thu leh uar zawk a kalpui dan tur te, PMEGP diltuten awlsam zawk a Project report an siam theih nan Project report siamsa entawn tur bank hrang hranga tarchhuah a tul thu te leh lo siam nana loan puk tum a bank rawn dawr thin tam tak te chu lehkha pawimawh an neih kim loh avanga hnar an nih thin thu tarlan a ni a. Thawtkhawm hmasaa Committee in a lo rel tawh angin Project Veng, Kolasibah leh Bilkhawthlira ATM dah a nih theih nan hma lak mek a nih thu sawi a ni bawk.

December ni 31, 2019 thlenga Kolasib District-a Bank hrang hrangte Credit Deposit (CD) ratio khaikhawm chu za zela 46.07% a ni a, hei hian CD Ratio bituk zat za zela 60 chu a phak lo a ni. Priority Sector tana loan pekchhuah zat chu za zela 52.28% a ni a, hei hian bituk za zela 40 a khum a ni. Bank dawrtuten bank dawr kawnga thil tul pawimawh hrang hrang an hriat theih nan Financial Literacy Cell kaltlanga Kolasib leh a chhehvel khuaah te inzirtirna kalpui ni se tih chu meeting hian a rel bawk a ni.