Mizoram Agriculture Department (Crop Husbandry) chuan tunlai hian Sensitization & Monitoring on Produce More Rice Programme an kalpui mek a, nikum 2011-a Chief Minister Pu Lal Thanhawla’n buh thar tam kum a puan bawhzuia buh thar zaa sawm (10 %) zeta a tam ta hi Department a thawktute leh kuthnathawktute thawhhona that vang a ni tih hriain, kuminah pawh hian nasa lehzuala tan la in Dr. C. Lalzarliana Director kaihhruaina hnuaiah Group 2 (pahnih) a insiamin Joint Director Pu H. Lalthanpuia leh Pu Lalrinliana te hovin team 4 (pali) in Mizoram District 8 (pariat) ah hma an la a, kumin chhung hian an district chan theuhte office mai bakah ram lam, leilet leh tlangram lo thlengin tum 4 (li) tlawh chhuak turin an in buatsaih. Tunah hian a vawikhatna (sensitization) an neih tawhah thawhhona leh tanrualna a lawmawm hle in an hria.

Agriculture Department-a thawktu Field staff leh Ministerial staff zawng zawng hmun ualau leh kilkhawr zawka awmte pawh tumah awl bik leh chuangtlai nia inngai awm lova thahnemngai taka thawkho turin an infuih a ni. Kuthnathawktute pawh an changkang zel a, thawhhona boruak tha tak nen, an hmalaknate sawrkarin a ngaihsak a, ngaih ngam taka ruahmannate an bawhzui theih thin avangin an phurin an tha pawh a tho hle a, hmabak thlen tur eng tak awm ngeiin an hriain an beisei.