Govt. T. Romana College in an College-a lut thar leh zirzo te puala inkhawm Vanapa Hall-a an buatsaih chu Parliamentary Secretary to CM Pu Lal Thanzara’n a hmanpui.

Pu Lal Thanzara chuan College kai thar te chuan sikula an hak thin uniform te hlipin putlinna, zalenna leh mawhphurhna kawng an zawh tan dawn a ni, a ti. College hi an nunkawng sialtu leh an hmalam huna an kawng zawh zelna tura kaihruaitu pawimawh tak a ni tiin zirlai kaithar te chu an hun tha bawhpelh lo turin leh hmalam pana theihtawp chhuaha tang zel turin a fuih a, anmahni leh an chhungkaw tan mai ni lo, ram tana mi chhuanawm ni ngei tura inpuahchah turin a fuih. College zir chhuak hlim, Graduate thar te pawh a lawmpui tak zet thu sawiin Parliamentary Secretary chuan zirlai tam tak zirchhuak theilo an awm laiin tha taka an pass chhuak thei chu an thawhrimna piahlamah an zirtirtu te thahnemngaihna vang a ni, a ti. College an kal chhung zawnga an thil zir te chu hringnun kawng dik leh tha zawh tur leh sualna a itawm viau pawha duhthlanna dik siam ngam tura puitu, harsatna an tawh chang a thlen pawha ding chang tura tanpuitu a nih ngei a beisei thu a sawi.

Pu Lal Thanzara hian Govt. T. Romana College Annual Magazine (2011-2012) ‘Raltiang Bihchianna’ chu a tlangzarh nghal a ni.

Govt. T. Romana College 20th Freshers Social cum Graduation Day ah hian an Principal Dr. F. Lalhmingsanga’n kaithar te fuihna leh Graduate te lawmpuina thu a sawi a. Student Union Vice President Lalramsanga Pautu chuan inlawmna thuchah a sawi bawk.