District Agriculture Office, Lunglei buatsaihin tukin zing khan Zawlpui loneitute chana thar hralhchhuahna runpui “Mega Sale on Pulses” chu Agriculture office tualzawlah neih a ni.

He Mega Sale hawnna inkhawm tawi Lunglei DAO Pu Tlangtimawia Zote kaihhruaiah Lunglei MJA President Pu H. Lalthansanga chuan kuthnathawktute thlai tharchhuah hralhna kawnga Department ten hma an la chu lawmawm a tih thu a sawi a, hei hian hun lo kal zel turah thlai chingtute phurna nasa tak a pek tur thu sawiin thlai chingtuten hlawk zawk leh tam zawka thlai an thar zel duhsakna nen he Mega Sale hi a hawng a ni. Lunglei DAO Pu Tlangtimawia Zote chuan kuthnathawktuten an thlai tharte awlsam zawka an hralhchhuah theihna turin hmalak pui zel an tum thu a tarlang a ni.  

Tukina Mega Sale neih takah hian Lunglei khawthlang lam Zawlpui khuaa National Food Security Mission (NFSM) Scheme hnuaia chana chingtu chhungkaw 20 ten tam thama an chana hring tharchhuahte Agriculture Department te hian a hmunah lei sakin an phur chhuaka, tlawm zawk leh man man zawka mipuite lei theih turin tukin khan an pho chhuak ta a ni. Lunglei tualchhung rate a Chana kg ah cheng 80 a nih laiin, he Mega Sale ah hian kg ah cheng 50 in hralh niin mipuiin an hlutin a zo rang hle a ni. NFSM Scheme hmang hian Zawlpui Compact Area-ah Field Pea (Chana)hi hectare 15 aia zim lovah  chin tir an ni a. Beneficiary-te hi Field Pea (chana) chi bakah hnim hlo (weedicide) leh thlai venhimna (Pesticide) a thlawna pek niin knapsack sprayer (hlo kahna khawl) pawh subsidized rate a pek an ni.