Mizoram
Chief Minister Pu Zoramthanga chuan Delhiah sawrkar laipuia mi pawimawh hrang
hrangte hmu in Mizoram mamawh a sawipui hlawm a. Nimin khan Union Minister of
Agriculture hmu in, vawiin khan Union Home Minister leh Minister of Consumer
Affairs, Food and Public Distribution bakah Agriculture Secretary, Additional
Secretary for Ministry of Road Transport, Highways & Shipping te a hmuh
bakah Myanmar Ambassador Moe Kyaw Aung nen an inhmu bawk.
Nimin 17.1.2019 khan Union Agriculture Minister Pu Radha Mohan Singh chu Chief Minister Pu Zoramthanga chuan hmu in Bamboo Plantation tihchangtlun chungchang te a sawipui a, Buh leh Wheat te, Oilseeds leh thlai tharah Mizoram a intodelh theih dan tur te a sawipui.
Vawiin khan Chief Minister hian Meghalaya Chief Minister Pu C.Sangma te nen Citizenship (Amendment) Bill chungchang Union Home Minister an sawipui bawk. He hunah hian Union Home Secretary te leh mi pawimawh te an kim tha hle. Chief Minister Pu Zoramthanga chuan Mizoram State-ah chuan he bill hi hman chi a nih loh thu chiang takin a sawi a ni.
Vawiin vek khan CM chuan Pu Ram Vilas Paswan, Minister of Consumer Affairs, Food and Public Distribution changtu chu a hmu bawk a. Mizoram mamawh hrang hrang sawipuiin Chief Minister chuan buhfai tam zawk hmuh theih nana hmalak pui theih nan leh Hill State transport subsidy la pek chhuah loh te pawh pe thuai turin a ngen. Union Minister chuan Chief Minister thu thlen hi tha taka lo dawngsawngin FCI kudam (Godown) lian Sairang leh Champhai a sak a nih tur thu leh, Mizoram hmun hrang hranga State sawrkarin kudam (Godown) an sak nan cheng vaibelchhe sawm (Rs 10 crore) pek thuai an nih tur thu a lo hrilh.
Pu Sanjay Agarwal, Agriculture Secretary nen inkawm bawkin Chief Minister chuan ei leh bara State a intodelh theih dan tura a hma thlir te leh economy nasa taka tih hmasawnna tur atana plan a neih te a hrilh a. Agriculture Secretary chuan a plan te chu lo phurpuiin theih tawpa hma an lolak pui tur thu a hrilh a. Project mumal taka siam a, Ministry a theh lut turin a rawn a, thei tawp a lo chhuahpui zel tur thu Chief Minister hi a hrilh a ni.
Pu Shambhu Singh, Additional Secretary, Ministry of Road Transport, Highways & Shipping nen pawh Chief Minister hi inkawmin, Mizoram Highway Project sanction tawhte a rang thei ang bera pe turin a ngen a. Additional Secretary leh Financial Adviser ni bawk hian rang taka hma lak a nih tur thu Chief Minister hi a lo hrilh a. Durtlang atanga Sihphir kawng zauhna tur Concept paper pawh January, 2019 chhunga theh lut tura chahin, chak taka hma a lo lak zui tur thu a hrilh.
Chief Minister Pu Zoramthanga chu vawiin ni khan Myanmar Ambassador Pu Moe Kyaw Aung chuan a thlenna Mizoram House-ah hmuin culture, education, border trade leh kawng hrang hranga thawhhona tha neih theih dan tur te sawiin inkawmna hun tha tak an hmang a ni.
