Tukin zing dar 7:00Am atang khan Dr.K.Beichhua, MoS i/c AH& VETY, Social Welfare etc. chuan Siaha District chhunga a Sawrkar office hrang hrang  te leh Sawrkar thar hmalakna tur hmun-hma  te a tlawh kual.

Vawiin Minister Dr.Beichhua in Sawrkar office a tlawh te chu  Social Welfare, Police, ICDS te a ni a. Sawrkar office te a tlawh mai bakah hian New Siaha VC Area huamchhunga Play ground siamna tur hmun te,  Tlahpi hmuna SGWSS tuilakna catchment Area leh tuihnar te a tlawh.   Siaha Helipad (Dropping Zone) atangin Drone hmangin  Eklavya Model Residential School dinna tur hmun Aereal  Survey te neih a ni.

Tlailam 1:00Pm ah MADC Executive te meeting Circuit house-ah a neihpui bawk. He meeting-ah hian huang zau tak leh rilru inpawh takin Eklavya Model Residential School din chungchang te leh Sawrkar tharin Siaha District-a Project  hrang hrang a kalpui tur ruahhmanna leh bawhzuihna kawnga GoM leh MADC thawhho dan tur te sawiho a ni.

MADC Executive te nen an neih zawh hian Circuit House-ah vek hian GoM hnuaia Head of Office te meeting a neihpui leh a ni.

He meeting-ah hian thu sawiin, Minister Dr.K.Beichhuah chuan mahni hnaa officer rinawm leh inpumpek te hi hotute pawhin kan zah che u a, kan ngaisang hliah hliah che u. Mahni hna a tui leh rinawm Sawrkar hnathawk te hi mi nihlawh leh mi hlimtheih tak, an awmna hmun apianga mi te ngaihnat leh Dept tana mi hlu leh chhuanawm an ni thin. Mahni awmna post sawisela iak iak te leh Pawisa tamna Post  emaw File mawm zawk emaw melh reng reng phusa Sawrkar hnathawk reng reng mi vanduai, mi khawngaihthlak leh mi hlim lo, an rawngbawlsak mipui leh Sawrkar tan pawha mi hnawksak an ni thuai thin a ni. Chuvangin kan officer chhuanawm tak tak te hian Siaha district a in awm hi inhremna hmunah te in lo ngai palh ang ti ka hlauh hle . Sawrkar hna kan thawh chhung chuan Mizoram khawi hmunah pawh  post thei reng kan ni tih hi i theihnghilh lovang u. Chutiang rilru put ai chuan Siaha district chhunga ka awm chhung hian  District tan leh mipui te tan hian rotling leh chhenfakawm thil eng emaw tal ka han hnutchhiah te ang, tih rilru pu vek turin ka beisei che u a, ka ngen bawk a che u. Rinawmna leh Dikna vuan chunga mipui rawng in bawl phawt chuan inlamah ka tang zel ang. Harsatna intawh chuan engtik lai pawhin phone a biakpawh thei reng ka ni ang, a ti. Inlungrualna hi chakna a ni tih i hre reng i la, finchhuah ka ngainaah min finchhuah u la, thurawn pek ka ngai hunah min pek hre bawk su u, a ti bawk.

Minister chuan meeting-ah hian report pe in vawiinah khan urgent schemes/project proposal cheng nuai Rs.200/- chuang DC kaltlang thehluh nghal a ni, a ti.

Chung te chu:

1. RCC Pavement  at Agape Home.

2. PCC Pavement approach to Grace Children's Home.

3. Widening of Road near New ECM office

4. Bethel church to Drop-in-Centre PCC Pavement.

4.  Dylisis Machine at Civil Hospital.

5. ICU stabiliser machine 2 nos

Vawiin MoS Dr.K.Beichhua in Office hrang hrang leh hmun-hma te a tlawhnaah hian Aizawl atanga a Dept chana official amah  lo tawiawm tu te bakah MADC hruaitute, GoM hnuaia Head of Office te leh Chanchinbu mi te  thahnem takin an tawiawm a ni.