Agriculture Department chuan Buh leh bal tam zawk thar chhuah a nih theih nana tan lain District tina an hmalakna hrang hrang dinhmun endik hna thawk turin ni 7.8.2012 atang khan an feh chhuak tan. Monitoring & Pest Surveillance neia zin chhuak Agriculture Officer-te hi Group 2-ah inthenin Joint Director 2-ten an kaihruai a, Group 2-te chu Team 4 ve veah inthen darh lehin Mizoram District 8 an tuam chhuak nghal dawn a ni.

Agriculture Officer zin chhuakte hian SRI hmanga buh chin te chu a hmuna tlawh chhuah vek an tum a, an kalnaa loneitute harsatna tawh te pawh enpuiin hlawk zawka buh leh thlai dang an thar theih dan tur kawng an dappui ang. Buh leh thlai te rannung leh natna dangin a tihbuai dan te a hmunah zir chiangin an mamawh ang zela hmalakpui an tum a. Kumina ruahtui a tlak tlem avangin loneituten harsatna an tawh te pawh a chin fel pui dan tur a hmunah an enpui nghal ang. Monitoring & Pest Surveillance hi August ni 15 hmaa zawh fel hman tum a ni. lnm