Tunlaiin hmun hrang hrang, a bikin Mamit leh Serchhipa zirlai ten zirtirtu indaihlohna avangin School khar leh kawng zawh hial te an huaihawt a. Heng hmun hniha mite chauh nilovin ram pumpuiah duh angin zirtirtu qualify kan indaihlo a ni tih Sorkar chuan a hria a, kan neih sa te atanga sem rual hna pawh ngawrh takin thawh mek a ni. Mamit dinhmun chu hetiang hi a ni :-

1. Mamit SSA atanga District danga transfer chungchang

Hemi chungchang hi Education Department chuan ngun takin a chhui mek a. Tuna an dinhmun atanga a lan danin single teacher awmna school 1 Phaizau Govt. Primary School leh teacher 2 chauh awmna school 2 - Dampa Zodin UPS leh Zonuam UPS an awm niin hriat a ni a. Hetah hian Special Trainer 1 leh Assistant Trainer 1 single teacher awmna ah hian dah a ni dawn a. Zirtirtu 2 chauh awmna ah hian Assistant Trainer 1 ve ve dah belh a ni ang. Hei hi August 2012 chhunga tihfel a ni ang.

2. Govt. Mamit High School

School report-a a lan danin Govt. Mamit H/S ah hian zirlai 117 an awm a. Headmaster an nei lova, senior most Teacher Lalnunzami, B.A., B.Ed.-in charge a la mek a, zirtirtu hi 5 an awm mek a ni. H.Zosangliana phei hi chu sawn tura an ngen avanga sawn a ni. Tunah hian Pu S.P.Singh M.A., B.Ed. chu Tawngkawlawng H/S atangin Govt. Mamit H/S ah transfer a ni a, Order pawh tihchhuah tawh a ni.

3. Govt. Mamit Higher Secondary School

Govt. Mamit HSS ah hian zirlai 100 an awm a, Class XI ah 45, Class XII ah 55. History subject Cl. XI-31, Cl. XII-33, Education Cl. XI-45, Cl. XII-30. Principal pangngai hovin English Dept. ah Lecturer 2, Mizo Dept. - 2, History Dept. - 1, Education Dept. - 1, Geography Dept. - 2, Political Science Dept. - 2, Economics Dept. - 2 te hi an dinhmun a ni. An dinhmun enin State pumpui angah pawh zirtirtu indaihlo pawl chu niin a lang lo. Pi Lallianvungi, Education Dept.-a mi tunhnaia sawn tak chu dah let leh tura order tihchhuah mek a ni a. 10th August 2012 hmaa order siam beisei a ni. Duhzuala Chawngthu (History) kalna Govt. Champhai HSS ah hian zirlai an tam fe bakah zirtirtu an indaihlo zawk hrih ni-a a lan avangin dahkir leh remchang lova ngaih a ni. Midang dah tur ang chuan ram pumpuiah enrollment leh zirtirtu te dinhmun endiknaah ngawrh taka kalpui mek a ni a, chumi zirchianna result atang chuan en leh a ni ang.

4. Govt. Mamit College

(a) Mizo dept Lecturer 5 atangin 2 attached-in, mamawh leh tulna zawk Hrangbana College ah dah an ni. Tunah hian Pu K.Zochungnunga chu Zawlnuam College atangin Govt. Mamit College, Mizo Dept. ah dah chhoh niin, Pi H.Malsawmdawngliani Part-Time Lecturer chu Mizo Dept., Govt. Mamit College ah dah a ni bawk a. Tichuan a awmsa Pu Ramropuia Sailo nen Mizo Dept. ah Lecturer 3 an awm dawn ta a ni. Dept. dang a hnuaia mite hi chu Mizoram-in a Norms on Pupil-Teacher Ratio ang chuan dinhmun pangngai takah an awm niin hriat a ni. (b) Education Dept. ah 6 awmin, 1 Hrangbana College ah attach a ni a, Lecturer 5 an la awm. (c) Political Science Dept. ah Lecturer 6 awmin Aizawl West College, Hrangbana College ah 1 ve ve attach niin Lecturer 4 an la awm. (d) History Dept. ah Lecturer 4, English Dept. ah Lecturer 3, Economics Dept. ah Lecturer 4 atangin 1 Hrangbana College ah attach niin 3 an la awm a ni. Public Administration leh Geography Dept. hawn belh chungchang chu Policy Matter niin Sorkar sum indaihlohna nen tun dinhmunah chuan kalpui ngam mai a ni lo. Serchhip Higher Secondary School atangin History zirtirtu Daisy V.L.Biaknungi sawn a ni a, a aiawh turin P.C.Lalruatzela, RMSA-a mi chu temporary-in attach a ni a, tunah hian contract zirtirtu tur dah turin Sorkar chuan a ti fel leh tawh a ni.

Education Department hnuaia zirtirtute hi Department danga thawk ve ang tho an ni a, khawi District emaw khawi khua emaw tan bika appointment pek an ni lo. Sorkarin tul a tihna hmun leh tangkai zawk tur ni-a a hriatna hmunah chuan sawn chhuah theih an ni ve tho a ni. Mizoram Sorkar hian khua/veng tinah zirlaite mamawh zirtirtu pe turin a vil reng a, ram pum thlir chung leh a tlin tawk hre rengin theihtawpin zirna tihchangtlun nan tan a la chho ve reng a ni.