Central YMA leh PHE Department tangkawp buatsaih ‘Tuihna Humhalh Beihpui’ thlak bul tanna chu vawiin khan Vanapa Hall-ah Chief Minister Pu Lal Thanhawla’n a hawng.

Chief Minister chuan ramngaw leh nungchate kan tihchereu nasat avanga tuihna kang chat nasa tawh tak, Central YMA leh PHE Department tangkawp ten a humhalh hna beihpui thlak an buatsaih hi a lawmawm hle a ni a ti a. Hetiang nachang hriat hi a pawimawh a, Pathianin a thil siam zawng zawngte hnena chanchintha hril tura min tih hi mihringte hnenah chauh nilo, ramngaw leh nungchate hnenah pawh kan hril tur a ni a ti. Mizoramah ramngaw tak tak hi 1% pawh kan nei tawh lova, a hring (green) ringawt chu kan nei tha a; mahse hei hi mihringte inhnangfakna tlak a nilo a ni a ti.Chuvangin tuihna nei tha tur chuan ramngaw tha kan la neihte humhalha, ramngaw tha kan siam a tul a ni a ti.

Tuihna humhalh pawimawhna hriaa CYMA in an conference a an lo passed hi a nachang hriat thlak hle a, Mizo ten YMA hi kan vanneihpui a, an hmalakna hi a lawmawm hle a ni a ti a. Ruahtui khawl nachang hriata tuizem neih a tul thu sawiin, Chief Minister chuan mahni intanpui thiam a pawimawh a ni a ti a. Hemi lama tanpuina pawh National Innovation Council ah te pawh thlen theih ani a ti. Intodelh hlutna hi Mizo ten kan hriat a hun tawh hle a, buhfai leh ei tur dangah ringlo mite kutah kan innghat lutuk hi a zahthlak a, kan intodelh thei a ni tih kan hriatchian angai hle a ni a ti. Kan mau te humhalh a tul tih hria in Cachar Paper Mill pawh kan chawm tawh lo a ni tiin, hemi avanga Mizoram hrek (economic blockade) an tumna te pawh kan hmachhawn ngam a ni a ti. Tunah hian Mizote ei leh bar zawnna leh sumdawnna (economy) hi mithiamte ruaiin thlak danglam (revolutionise) tum mek a nih thu a sawi bawk.

National Bamboo Mission Society (NBMS), Mizoram leh CYMA ina mau atanga kuang siam, civil hospital atan puitling kuang 30 leh naupang kuang 10, Durtlang hospital atan puitling kuang 20 leh naupang kuang 5 siamte chu a tul atana hman atan Chief Minister hian Dawrpui leh Durtlang YMA Branch hruaitute hnenah NBMS atanga heng kuang lakchhuahna tur certificate a hlan a. Chief Minister chuan ramngaw humhalh duh avanga mau hmanga kuang siam ngaihtuah chhuah a ni chu a lawmawm hle a, matply atanga thil siam hi a to thin hle a ni a ti. Kuang (‘Mau Kuang’) pakhat siam man hi NBMS chuan Rs. 2500/- sen anih thu a tarlang a. NBMS hian kumin chhung hian ‘mau kuang’ 250 vel siam an tum a ni. CYMA hian private hospital hrang hranga hman atan engemawzah kuang hi a kawl bawk a ni.

Hawnna inkhawm kaihruaitu Pu S.Hiato, PHE Minister chuan tuihna humhalh beihpui thlakna hian rah tha tak a chhuah ngei a beisei thu a sawi a, he ni hi PHE department tan chuan ni chhinchhiah tlak a ni a ti. PHE Engineer-in Chief Pu R.Lalfanliana pawhin thusawiin tuihna tih chakna awm thei ang kawng hrang hrangte te a sawi bawk a. CYMA President Pu T. Sangkunga pawhin thusawi bawkin tuihna humhalhna kawngah pawl pakhat mai hmalakna a tawk lo a ni tiin, PHE te, E&F. Soil & WC, RD, Horticulture, Agriculture te pawh an pawimawh vek a ni a ti a, kan zavai maia tan lakna chi a ni a ti.