Vawiin chawhma dar 11:30 khan Lunglei DAO Conference Hall-ah Agriculture Department hnuaia trade thlangtute hnenah NLUP tanpuina sem a ni a. HPC Vice Chairman Pu S. Laldingliana chu Khuallian niin NLUP beneficiary-te hnenah tanpuina a sem.

Pu S. Laldingliana chuan Zoram kuthnathawktute chu in vannei in, sawrkarin kuthnathawktute Ni hial a siam a ni, a ti a. Kuthnathawktute din chhuah nan sawrkarin NLUP a duang a, mirethei leh chanhai te dinchhuah nan chauh nilovin ramngaw chereu tawh thar thawhna a keng tel bawk a ni, a ti. Kumtin ramngaw tha tak tak tihchhiat ngai lova NLUP hmanga eizawnna hmun nghet siamsak hi sawrkar tum a ni, a ti a. Rinawmna leh tih tak tak na thinlung nena dawng theuh turin a duh thu a sawi. NLUP hmanga dingchhuak tam tak an awm tiin, taihmakna nena in thawh chuan in ding chhuak ngei ang, a ti a. Sawrkarin a tih tur a tih ang bawk an kova tihtur awm theuh chu tihhlawhtling turin a chah a, Sawrkarin NLUP-a vanduaina tawk te chhawmdawl nan New Economic Developement Policy (NEDP) hnuaiah cheng vaibelchhia 250 a dah thu a sawi bawk.

Lunglei District NLUP Coordinator Pu Zathangliana pawhin sawrkarin kuthnathawktute a duhsakzia hre thar leh a, taihmakna nena hma la theuh turin a chah a. Sawrkarin min hmangaih ang bawkin kan hmangaih let ve a tul a ni a ti. Mizoram ram nuam taka siam tu tur chu NLUP beneficiary-te in ni, a ti bawk.

NLUP semna inkhawm hi Lunglei SDAO Pu Ngurrinsanga’n a kaihruai a, Lunglei Circle AEO Pu Ramliana’n lawmthu sawiin a khar a ni. Agriculture Department Lunglei Circle huamchhunga WRC-I, WRC-II leh Oil Palm thlangtu beneficiary 94-te hnenah cheng nuai sawm leh singthum, NLUP 3rd leh 4th Phase sem a ni.