495/2025-2026

Aizawl the 20th May, 2025 : Vawiin khan Agriculture & Farmers’ Welfare Department chuan an Office Conference Hall-ah Agriculture Minister Pu PC Vanlalruata hovin ni hnih awh tur (19-20.05.2025) review meeting a buatsaih a. He hunah hian kum kal ta a Agriculture Department hmalak tawhna te leh kumin a scheme hrang hrang hnuai a hmalak lehna tur hmachhawp te thlir ho a ni.

He programme ah hian Natural farming chungchanga inzirtirna leaflet pathum (3), KVK, Kolasib in an buatsaih chu tlangzarh a ni.

Pu P.C Vanlalruata chuan thu sawiin, Agriculture & Farmers’ Welfare Department chu hmalakna tam tak a lo neih tawh thinah, siam that ngai lai te pawh a awm lo thei loa, chung fuhlo te chu siam that zel tum a ni a ti a. Agriculture hmasawnna atan a hmalakna hrang hrang chhunzawm loh leh hlawhtling zo lo awm thin te chu pawi a tih thu sawiin, Sawrkar hruaitu te, Department a thawkte leh tanpuina dawng thin farmer te thlengin he thil ah hian kan inenfiah tlan a ngai a ni a ti.

He hun a kalkhawm Agriculture Officer te chu an mahni hna chanpual theuh te ti khawtlai lova, a rang thei ang ber a hma la nghal turin a chah a. Tlangram loneitu te nasa leh zuala ngaipawimawh a, an hmasawnna tur a ruahmanna thar tha tak siam thei turin a chah bawk. Sawrkar tharin mipuite leh loneitute nena inzawmna tha tak thlai thar market hmangin a buatsaih a. A market a kan buai lohna tur thlai kan thlan thiam a pawimawh hle tih a sawi.

Pi Ramdinliani, Special Secretary, Agriculture & Farmers Welfare Department pawhin fuihna thu a sawi a. Agriculture Department hmalakna tam tak a neih thin te chu kimchang taka documentation neih thin ni se, tunlai thiamna Artificial Intelligence te pawh hman tangkai a pawimawh a ti a. Department hmalakna te chu mi te hriat theih tur a phochhuak tam tur leh, kuthnathawk tu te tan a tangkai thei tur scheme hrang hrang a hmalakna te pawh nasa leh zual a thehdarh turin kalkhawm te a chah a ni. Line Department dang te nen nasa leh zual a convergence kalpui turin a chah bawk. Thangtharte’n thlai enkawl an tuipui ve theihna tur a thalai te ti phur thei zawnga thlai enkawl dan te pawh ngaihtuah a tul a ni a ti bawk.

Review meeting hi Pu R. Lalnunzira, Director, Agriculture & Farmers’ Welfare Department chuan a kaihruai a. District hrang hrang a DAO ten scheme hrang hrang 15 an kalpui dan report an pe a, Pi Lalmuansangi, Scientist, MIRSAC in mapping hmangin WRC potential te entirna a nei a. Agriculture Department hnuaia scheme- ATMA leh KVK kaltlanga hmalakna te pawh report niin kumin 2025-26 atana hmalak dan “Annual Action Plan” sawi ho a ni bawk.

He meetingah hian Pu Lalnunhlua, Addl. Director Agriculture & Farmers Welfare Department leh Officer thahnem tak an tel a ni.