Agriculture Department Director Dr. C. Lalzarliana hovin Agriculture Department thawktute chuan nimin (15.09.16) khan Aizawl District chhunga Buhban khua loneitute tlawhin, leh ‘lo zawh’ an hmanpui a ni.

Lo zawh puala Community Hall-ah khawtlang inkhawm buatsaihah Agriculture Director chuan thu sawiin, Buhban khua in hetianga buh tha an nei thei hi khaw mipuite thawhrimna leh taimakna vang a nih thu sawiin, ram zahawmna leh hausakna chu thawhrimna atang chauhvin a neih theih a ni, a ti a. Ram leh Hnam humhalhna tha ber chu kan ram neih chhun atang hian buh leh bal kan thar chhuak anga, mahni intodelhin kan ram leilung hausakna hi keimahniin kan hai chhuak anga, tangkai zawkin kan hmang tur a ni, tiin kalkhawmte chu mahni intodelh kawng zawh zel turin a sawm a ni.

Buhban khua hi in 147 awmna khua niin mihring 700 chuang an awm a. WRC-Il (Terrace) nei chhungkaw 36 awmin an terrace zau zawng hi a vaiin Hectare 20 vela zau nia ngaih a ni. Hetih lai hian Tlangram loneih-a eizawng chu chhungkaw 97 awmin, chawhrualin chhungkaw pakhatin buhfai tin hnih (2) hmun vel zel nei ang an ni. Chhungkaw pahnih (2) in Fu chingin, Sawhthing ching chhungkaw hnih (2) an awm bawk. Kumin hian Buhban khaw hming put chhan, Buhban Mualpui Zau ram tha an bawh a, an buh pawh a tha rual hle a ni.

He loneitute intawh khawmna leh lozawh hmanna hunah hian Agriculture Directorate atang leh Aizawl District atangin Officer leh Staff eng emaw zat an tel a, tlaiah khawtlang huapin ruaitheh nghal a ni.