Vawiin hian Young Mizo Association, Piler Branch in an kum 70 tlin Piler Community Hall-a an lawmnaah Mizoram State Women Commission Chairperson leh Bialtu MLA ni bawk Vanlalawmpuii Chawngthu chuan khualzahawm niin a hmanpui.

Thusawiin Pi Lalawmpuii Chawngthu chuan, Piler khua Branch YMA in kum 70 a tling thei chu lawmawm a tih thu sawiin, hetiang ang hun hlu Piler YMA in a lawm theihna tura YMA lo dintute leh lo kaihruai tawhtu zawng zawng te chu chawimawi an phu hlea a hriat thu a sawi. Khualzahawm chuan, YMA member tha tak chuan intodelh a tum tur a ni a, khawtlang, ram leh hnam hmasawnna a ngaihtuahin, Kristian nundan tha a ngaisangin a nunpui tur a ni, a ti bawk a. Kan rama ruihhlo hluar zel chu pawi a tih thu leh YMA member te chu hetiang ruihhlo hlauhawm tak tak laka fihlim tur te, sualna lo punlun zel ti tlema, khawtlang nuam leh him siam tum tlat turte in a fuih bawk.

Hengte bakah hian khualzahawm hian sawrkar hmalak pawimawh hrang hrang te tarlangin ram mipuite thawhpuina leh tawiawmna a pawimawh zia a sawi a, khua leh tui tha ni tura inbuatsaih zel turin Piler mipuite a sawm a ni.

Piler khuaah hian in 80 awmin, mihring 500 vel an awm a. YMA member 370 (mipa 133, hmeichhia 137) an awm a ni. An khua hian kum 2014-2015 khan Tuichangral South Group YMA ah Nungcha leh ramngaw humhalh tha ber lawmman an la nghe nghe a, CYMA in a pek thin Hruaitu hlun chawimawina dawng mi 4 an nei bawk.