Vawiin khan Chief Minister Pu Lal Thanhawla chuan Lunglei ah Mizorama Convention hmasa ber Convention Centre Lunglei, cheng nuai 1877.40 senga sak zawh tak chu Mizoram mipui leh a neitu Lunglei mipuite ten tangkai taka an hman thei turin a hawng. Covention Centre hawnna programme Convention thar Hall-a neiha Chief Minister chu khuallian niin Transport Minister Pu John Rotluangliana leh Local Administration Department (LAD) Minister Pu P.C. Lalthanliana te chu khualzahawm an ni a. Hawnna programme hi Urban Development & Poverty Alleviation Minister Pu Zodintluanga'n a kaihruai a, Lunglei High Powered Committee Vice Chairman leh Lunglei South bialtu MLA ni bawk Pu S. Laldingliana leh Lunglei West bialtu MLA Pu Chalrosanga Ralte te pawh he programme ah hian an tel a ni.

Chief Minister Pu Lal Thanhawla chuan Lunglei Convention Centre hawn a ni ta chu Lunglei District tan hmasawnna rahbi pawimawh tak tukna ni anih thusawiin Mizoram hi kan thangzelin, hma kan sawn zel a, hun a lo inher chhoh avangin tun hmaa kan mamawh loh te chu thil mamawh leh tul a ni tawh a, Covention Centre changtlung tak hi tunlai khawvel thang zelin a mamawh a ni a, Aizawl pawha la awm lo Convention Centre hawna a ni ta chu a vanneihthlak leh a lawmawm a ni, a ti a. Ngaihsak loh leh ngaihthah nia in hriat hi thil hrehawm ber anih thusawiin Lunglei hlamchhiah niawm ngaihtuahna awm thin te leh Lunglei hmasawnna leh Lunglei mipuite mamawh chak taka bawhzui anih thei nan Lunglei High Powered Committee hi 2008 khan changtlung zawkin din chhoh lehin hma an la tan a, Convention Centre hi he Committee ina Lunglei mamawh an thehchhuah hmasa pawl a ni, a ti a. He Convention Centre sak anih thei nana ngaihtuahna nasa taka seng tu Pu Joseph Lalhimpuia, Mizoram pawna programme dang a nei avanga a tel thei lo chu pawi tiin chak taka UD&PA Minister Zodintluanga leh a thawhpui ten chak taka hma an lak avangin Convention Centre hi kan nei thei a ni, a ti bawk.

Chief Minister chuan vantlang tana thil pawimawh capital assets kan tih ang hi ta nei kan thiam lo hle a, hei hi kan kalsan a hun tawh a, Sorkar leh vantlang thil te hi duat taka mahni ta anga kan enkawl hi kan zavaia mawhphurhna a ni ti kan hriat tlan a hun tawh hle a ni, a ti a. Convention Centre hi a neitu chu Lunglei mipuite an ni a, Mizoram mipui zawng zawngin tangkai takin kan la hmang zel dawn a, thianghlim leh dimdawi taka hman leh enkawl ani thei nan zuk leh hmuam phallohna hmun ani tih signages te tam tak tar a tul thu a sawilang a. Convention Centre hian mipui pun khawmna ang chi thil tam tak a phuhru dawn mai bakah MST leh Railway Booking Counter te awm hian vantlang rawngbawlna kawnga nasa leh zawkin phuisuina a siam dawn bawk a ni, a ti.

Pu Lal Thanhawla chuan Zofate hi Pathianin laka mibik kan nih tih kan hriat ka duh a tiin khawvel sakhaw lian ber berte ten Zofate chenna chu an hual chungin a hnam tlanchhauhte kan ni a, hei hi kan hriat renga, amah chawimawi a, a thinurhna nilo, a malsawmna leh a zahngaina tawngbaw tura kan khawsak a pawimawh a ni, a ti. NLUP chungchang sawiin Chief Minister chuan NLUP hian sum leh pai leh ei leh bara intodelhna thlen a tum, piah lamah khawvel lum chho mek global warming tih zaihawm te, tui hna kang chat mekte siam that  leh ram ngaw chereu tur ven te a fuan kim a, hengte tunlai khawvel mamawh niin hei hi UNO pawh ina a ngaihven hle, chuvangin UNO agency pali inzawmkhawmte chuan Aizawl pisa neiin an in bun tawh a ni, a ti a. NEDP chu NLUP chhunzawmna leh NLUP a hlawhtling te puihna na tur leh tang tura tanpuina anih thu a sawi a. Mipui kalkhawmte chu a chhe lai siam that chu Sawrkar mawh leh mipui mawh angkhata anih thu hrilhin ram leilung faten neitu rilru pua kawng engkima kan thawhho a ngaih thu a sawi bawk.

Programme kaihruaitu UD&PA Minister chuan Lunglei khawpui leh a chheh vela hmasawnna hna hrang hrang thawh mek leh thawh zawh tawh lian thamtak tak  te tarlangin Sawrkar hotulu ber hian Lunglei hmasawnna tur a ngaituahin Lunglei hi a hmangaihin a ngaisak hle nia a hriat thu a sawi. Thusawitu dang Transport Minister Pu John Rotluangliana chuan Convention Centre chhunga Transport Department office tur - MST leh Railway Booking Counter sak kep anih chu lawm thusawiin Convention Centre hi Lunglei tan mai nilo Mizoram pum tan hmasawnna lian tak nia a hriat thu a sawi bawk. LAD Minister Pu P. C. Lalthanliana pawhin thusawiin Convention Centre hi Lunglei tan thil hlu tak leh pawimawh tak a ni a, he malsawmna kan dawn a hian mipuiin lawmna chang kan hriat a pawimawh a ni, a ti.

Programme ah hian Rev F. Ramdinmawia, President, Mizoram Kohhran Hruaitu Committee (MKHC) Lunglei in hunserh a hmang a. UD &PA Director Pu Zorammuana hnenah atangin Technical Report ngaihthlak niin he Convention Centre a facilities awm leh ruahmanna te a tarlang a. Lunglei DC Pu Abhijit Vijay Chaudhari'an lawmthu sawiin hun a khar a ni.

Convention Centre Lunglei hi cheng nuai 1877.40 senga sak niin Sawrkar Laipui Ministry of Urban Development hi Funding Agency niin, Implementing Agency hi NBCC Limited an ni a, UD &PA Department chu Nodal Agency an ni thung a. M/S Stup Consultants Pvt. Ltd. chu Consultant niin a satu contractor hi M/S Trilok & Associates an ni. He project hi March ni 30, 2010 a sanctioned a ni.

Lunglei Convention Centre hi RCC Frame Structure niin Mizopa chhiar a chhawng sarih a sang a ni a. Office atan hman theih tur floor te, quarters, khualzin tena an hman tur platform pali leh ticket lakna, railway out agency, driver room, choka leh canteen, ruaithehna hall te a awm a. Heng bakah hian facilities changkang tak nei mezzanine floor, VVIP leh VIP thlenna tur suite 3 a awm tel a. Mi 200 len theihna Air conditioned hall changtlung tak sound leh projector awm sa a awm a. Chawng tinah inthiarna mipa leh hmeichhia leh rualbanlo te tana hman tur a awm  bawk a ni.