Vawiin chawhma dar 11 khan School Education leh Industries Minister Pu H Rohluna chuan Kawlkulh Community Hall ah Agriculture Department hnuaia 3rd leh 4th Phase NLUP tanpuina 2nd installment NLUP beneficiary 96 te hnenah cheng nuai 19.20 a sem.

Khuallian School Education Minister Pu H. Rohluna chuan kuthnathawktute chawikan chu sawrkar ngaihpawimawh ber a ni tih sawiin NLUP hlawhtlinpuitute chanchin hriat hian min tihlim hle a, chutihrual erawh chuan a hlawhtlinpui velo engemawzat an awm tih erawh kan hria a ni, a ti a. Sawrkarin NLUP chu atira a ruahman ang diak diakin kalpui theilo mahse a kalpuidan a tha tawk hle a, mi taima leh tih takzeta thawkte chuan an hlawhtlinpui tih mithiamte zirchianna chuan a tarlang a ni, a ti bawk. A Department chan, Industries Department chung changah Industries Minister chuan NLUP hlawhtlinna leh a diklo lai hre tura zirchianna MZU mithiamte nen an neih thu sawiin an thil hmuhchhuah chu a lungawithlak a tih thu a sawi bawk. Minister chuan lo neih tihmasawn tura sawrkar hmalaknate tarlangin NEDP hmangin hralhchhuah tham thar tur te, mipui hriselna atan leh zirna tihhmasawn nan te sawrkarin hma a lak zel dawn thu sawiin mipuite chu thawhpuiah a sawm bawk.

Kawlkulha NLUP semna inkhawm kaihruaitu Champhai District Bawrhsap Pu Vanlalngaihsaka, IAS pawhin NLUP chu kuthnathawktute khai chhuahna tur leh kan ram thing leh mau humhalh nana policy pawimawh tak a ni a, NLUP dawngtu bakah a dawnglo zawng zawngte pawhin a zar an zo tur a ni, a ti a. Champhai District Agriculture Officer Pu RK Nithanga’n report pe in Agriculture Department hmalakna hrang hrang a tarlang a, Champhai District Agriculture Department in kumin buhseng zawh veleh NEDP hnuaiah purun sen ching tura hmalakna kalpui mek thu a tarlang a, NLUP dawngtute chu buh tharchhuah a pun ngei thei nana tanla turin a chah bawk. Pu Lalchharliana, SDAO, Khawzawl in lawmthu sawiin hun a khar a ni.

Vawiina NLUP sem hian Kawlkulh, Pawlrang, Puilo, Chhawrtui, Vanchengpui leh Saichal khuate a huamin Agriculture Department hnuaia WRC I & II bik tan NLUP 3rd Phase leh 4th Phase ah beneficiary 96 an awm a, beneficiary tin tan Rs. 20,000/- theuha sem a ni a.

Tarlan tawh angin Champhai District ah hian Agriculture Department hnuaia NLUP dawngtu 1st phase ah 920, 2nd phase ah 1231, 3rd phase ah 756 leh 4th phase ah 353, avaiin beneficiary 3,260 an awm tawh a, cheng vaibelchhe 31.31 chuang tanpuina semchhuah tawh a ni.